నిత్య సురక్షిత

 నిత్య సురక్షితా.. 36. నూతన వృత్తాలలో (36x3=108) నా మనవరాలు నిత్య సురక్షైత. పేరు మకుటముగా 108 పద్యములు.

1)మత్తకోకిల(1)

ఎన్నిజన్మల బంధమోయిది యేరికెవ్వరు చెప్పుమా

మన్నికైనది లేదులేదని మాటిమాటికి చెప్పెదన్!

ఉన్నవారికి లేనివారికి యున్నదొక్కటె యాశలే

కన్నవారిని కన్నవారిని గాచు నిత్యసురక్షితా.1

ఇన్ని కోర్కెలు పుట్టుచుండుటదేమి చిత్రమొ  చెప్పుమా

యెన్నికోర్కెల కన్నిజన్మము లెత్తగావలె సత్యమే

దన్ను శ్రీ పరమేశుడుండిన తక్కువేమిటి చెప్పుమా

చెన్నుగన్ బలికించితీవని చెప్పె  నిత్యసురక్షితా.2

((ఉన్నదొక్కటి రెండులేవట యున్నదేమిటొ  చెప్పుమా

కన్నులున్నను గాంచలేరట కారణంబది యేమిటో

కన్నదెవ్వరు విన్నదెవ్వరు గాఁచువాడది వెన్నుడే

వెన్నదొంగని వేడుకొమ్మిక వేగ నిత్యసురక్షితా.3))

ఉన్నదొక్కటి రెండులేవట యున్నదేమిటొ  యందు నా

కన్నుదమ్ముల నందునామరి యాడ బిడ్డల నుందురా

కన్నదెవ్వరు విన్నదెవ్వరు గాఁచువాడది వెన్నుడే

వెన్నదొంగని వేడుకొమ్మిక బేల నిత్యసురక్షితా.3

2)వనమంజరి

నజజజజభర-14

కరివరదాయని ప్రార్థనజేయగ కాచినాడట సత్యమే

సరగున దాల్చక శంఖము చక్రము జాయకైనను జెప్పకన్

సిరులనుగోరక చింతలుదీర్పగ శ్రీనివాసుని వేడగన్

పరుగులుబెట్టుచు కావగవచ్చును బాల నిత్య సురక్షితా.4

వరదుడు వేంకట నాథుని శౌరినిపద్మనాభుని దల్వగన్

చిరుచిరు కోర్కెలు తప్పక దీర్చును శ్రీనివా సుని నమ్మగన్

విరులను జల్లిన వేదన దీర్చును వేంకటేశుడు సత్యమే

మరువక దాశరథీయని బిల్చెదమమ్మ నిత్య సురక్షితా.5

హరహర శంకర పాపవిమోచన యంత కాంతక బ్రోవరా

సురమునివందిత శ్రీ ధరసేవిత సుందరానన శ్రీ కరా

నిరతము దల్చుచు చిచ్చఱకంటిని నీల కంఠుని వేడగన్

కరివస నుండిక వేగమె వచ్చును కాచు నిత్యసురక్షితా.6

సురమునివందిత శ్రీధర సేవిత సుందరానన బ్రోవరా

వరసుగుణాకర దీనజనావన పాహిపాహి సదాశివా

హరహర శంకర పాపవిమోచన యంచు వేడిన చాలదా

దరిశనమిచ్చును జంగమదేవుడు తానె  నిత్య సురక్షితా.6

3)అరసాత, అలసా మకరంద 

భభభభభభభర-13

ఆశనిరాశల చిక్కిన జన్మము నార్తిని బాపగ రాముని వేడుచున్

దాశరథీయని ప్రేమగ బిల్చుచు దండము పెట్టిన కర్మము లుప్తమౌ

పాశములన్నియు పారగ ద్రోలెడి పావన నామము రామునిదే సదా

కేశవమాధవ యన్ననుచాలును క్లేశము లుండవు నిత్యసురక్షితా.7

వైష్ణవి లక్ష్మియపర్ణని గొల్వగ వైభవమబ్బుట సత్యముగా సదా

విష్ణుని గాథలు పాడుచునుండగ వేదన తీర్చును పార్వతియే సదా

జిష్ణుని దల్చుచు నామము బల్కుచు సేవలు చేయుట మేలుకదా సదా

కృష్ణుని రూపము దల్చుచు భక్తిగ కీర్తన చేయుము నిత్య సురక్షితా.8

మ్రొక్కినవారికి యాపదలుండవు మోదము గూర్చును మాశివుడే సదా

చక్కనినామము నిత్యముపాడెడి శక్తిని గూర్పును శంకరుడే హరా

చక్కని తండ్రివి జంగమదేవర సాధుజనావన కావమనన్ భళా

చిక్కులుదీర్చును చిత్తమునుండుచు క్షేమము గూర్పును నిత్య సురక్షితా.9

4)ఉజ్జ్వలా

ననభర-7

జలజలమని జారిన వానలా

కలరవములుగా వినిపించుచున్

తళతళనను తారల వెల్గులా

నిలుము మదిని నిత్య సురక్షితా.10

గల గలమను  గాజుల సవ్వడుల్

మిలమిలమను మీనపు కన్నులున్

తలపుల పరదాలను దాకుచున్

నిలుము మదిని నిత్య సురక్షితా.11

అలకలు పరిహాసము లాడగా

కిలకిలములు కేతన మెత్తగా

జలదరములు‌ జార్చిన చిన్కులా

నిలుము మదిని నిత్య సురక్షితా.12

5)ఉపమాలినీ (ప్రియా/రూపమాలినీ)

నన తభ ర-9

చిరునగవుల చిందించి రమ్మని కోరెదన్

కరుణను గురిపింపంగ పాదము లంటెదన్

వరముల కొరకై దీప హారతులెత్తెదన్

నిరతము మది నీపైనె నిత్య సురక్షితా.13

సుజన వినుత దేవీ శుభంకరి కావవే

గజముఖ జననీ శ్రీ కరీ మము బ్రోవవే

కుజనులు గని చీకాకులే తొల గించుచున్

విజయము లిడవా దేవి నిత్యసురక్షితా.14

వరముల గురిపించే ప్రభాకర శోభలన్

తిరుమల గిరిపైనే తిరమ్ముగ నుంటివా

దొరవని నిను గాంచన్ దువారము ముందుగన్

చొరగొన మిము దర్శించు నిత్య సురక్షితా.15

6)కథాగతి

తరభనజభర-15

భీమేశ్వరుండుతా పూజలగొనుచును దేవితో గను పించడా

సోమేశ్వరుండుతా వెన్నెల వెలుగుల దాసులన్ కరు ణించడా

రామేశ్వరుండుతా రక్షణ నిడునట ధారగా జల మీయగా

క్షేమమ్ము గూర్పడా స్వామి మొరలువిని దానె నిత్య సురక్షితన్.16

శృంగార నాయకాశ్రీకర శుభకర హే చిదాత్మక ప్రోవరా

లింగాత్మకా భవా దర్శన మిడగను వేడెదన్ కరుణించరా 

భృంగమ్మునౌచు మీచుట్టు తిరిగెదను మోవిపై చిరు నవ్వుకై

గంగాధరా హరా కావర శుభకర వేగ నిత్యసు రక్షితన్.17

భారమ్ము వైచెదన్ ప్రోవగ శుభకరి పావనీ మము గావవే

చేరంగ వచ్చితిన్ మాధవి సురనుత వేచితిన్ నిను గాంచగన్

మారాము చేయకన్ మాకు కనబడవె నామమే బలికించవే

శ్రీ రంగ నాయికీ శ్రీ హరి సతి తవ దాసి నిత్యసు రక్షితన్.18

7)కిశోరము / కరశయా

నభర (యతిలేదు)

పదములంటుచు వేడగన్

ముదముగల్గును స్వామికిన్

మదిని దల్చుచు నిత్యమున్

కదులు నిత్యసురక్షితా.19

అదను కోసము వేచితిన్

సదముతీర్చును రాముడే

పదములందున వాలగన్

కదిలె నిత్య సురక్షితా.20

హృదయమందున నిల్పగన్

చదునుజేసి మనంబునున్

దదనమిమ్మని రామునిన్

కదిలె నిత్య సురక్షితా.21

8)కురంగికా

మతనజభర-13

శ్రీ రామా మాతండ్రి దయగనవేల సేవల గైకొనన్

మారామా మాస్వామి కనబడవేల మానిని సీతతో

రారా మాలక్ష్మన్న హనుమల వెంట రక్షణ జేయ క

న్నీరై జారెన్ జీవితము కరుణించు నిత్య సురక్షితన్.22

భ్రాతల్ చుట్టంబుల్ సుతులనుచు దిర్గి ప్రార్థన లేశమై

నాతిన్ ప్రీతిన్ జూడ మునుకొనువారు న్యాయము వీడగన్

పాతాళంబందున్ పరుగులిడు పాముభాతిన చావరే

నీతుల్ చెప్పంగా సులభమనియంద్రు నిత్య సురక్షితా.23

లోకంబందున్ జీవులను దొరకొన్న రోగము లుండగ

న్నేకాలంబందైన సుఖముగ వారలీశుని దల్తురా

సాకారంబౌనా మనుజులకు జన్మసద్గతి సాధ్యమా

నీ కాయంబందున్ నిలువదగునౌన నిత్య సురక్షితా.24

9) గగనమణి

 భమసభర-11

కోరికలందున్ జిక్కితి చీకాకుల నొందితిన్

సారెకు జన్మంబుల్ కలుగంగా జనియించితిన్

సారథి నీవై నారధమందున్ చరియించవే

తారక రామా కావుమయా  నిత్య సురక్షితన్.25.

ధారుణి పై జన్మించితినే సాధన వీడితిన్

తీరని యాశాపాశము లందున్ తిమిరంబులో

మారని కర్మంబుల్ పరమేశా మధియించగన్

దారుణ మౌగా, కావుమయా  నిత్య సురక్షితన్.26

వారధి నిర్మింపన్ రఘురామా పరమేశ్వరా

తారణమౌనా జన్మ కపీశున్ తరలించవే

చేరెద నీపాదాబ్జములన్ దాసిని కావవే

తారక రామా కావుమయా  నిత్య సురక్షితన్.27

10) గజరాజు

     నజభభర-8

వరముల నిచ్చుదేవర కావర ప్రోవరా

చొరగొను మయ్య దాసుల యాశలు దీర్పరా

తిరుమలకొండపై తిరమైతివి వేంకటే

శ్వర కరుణించి కావర నిత్యసురక్షితన్.28

కలుములు బాపరా కలవంచును నమ్మితిన్

వలువలనిచ్చినావట ద్రౌపతి రక్షకై

కలవరమందితిన్ గనుపింపవు శ్రీ హరీ

వలచినదాన కావర  నిత్యసురక్షితన్.29

శరణము దాశపోష జనార్ధన దేవరా

శరణము శ్రీనివాస రమాపతి బ్రోవరా

శరణము వేంకటేశ్వరమాధవ శ్రీ ధరా

వరదుడవంద్రు కావర నిత్య సురక్షితన్.30

11) గౌ (ననభభర-10)

హరిహరియన భక్తుల యార్తిని దీర్చవా

కరివరదుడవందురు కావగ రావయా

శరణు శరణు మాపతి సన్నుత శ్రీ ధరా

నిరతము నిను నమ్మెడి నిత్య సురక్షితన్.31

కరివసనుని దల్తును కార్తిక మందునన్

కరివరదుని గొల్తును కావగ వేగమే

హరిహరులను దల్చిన యార్తిని బాపరా

నిరతము మిము నమ్మెడి నిత్య సురక్షితన్.32

తిరుమల గిరులందున తీరుగ నుంటివా

తిరుపతి దొరవందురు తీరుగ మిమ్ములన్

సిరులనడుగ నీదరిచేరితి రక్షకై

నిరతము నిను నమ్మెడి నిత్య సురక్షితన్.33

((కరి మొరవిని క్రన్నన కాచిన దేవరా

చిరణములిడు మాపతి సన్నుత శ్రీ కరా

దరిశనమిడ వేడెద దత్తుడ ప్రోవరా

నిరతము నిను నమ్మెడి నిత్య సురక్షితన్.))

12) చలా (మభనజభర-10)

నిన్నే రూపంబున గొలుతు నీదయ గోరితిన్

నిన్నే నామంబున పిలుతు నీదరి జేరగన్

నన్నీ జన్మంబున శివుని నామము బల్కగన్

నిన్నే నాదైవతమనెడి నిత్యసురక్షితన్.34

గోవిందా యిందిర రమణ గోకుల నందనా

దేవా దీనావన వెదికితిన్ శరణంచునే

బ్రోవంగా కోరితి వరసుధాకర కావరా

నీవే దిక్కంచు మొరవిని నిత్యసురక్షితన్.35

కోపావేశమ్ముల కరకు కోరల జిక్కితిన్

భూపాలా శ్రీ ధర యనుచు మ్రొక్కెద కావరా

పాపంబుల్ చేసి శరణని బాయక పట్టితిన్

నీపాదాబ్జమ్ముల విడని నిత్యసురక్షితన్. 36

13) జననీముద

     నసతజభర-9

రజత గిరిశా యీశా  రమణీయ నాట్యవిశారదా

సుజన జనమందారా సుగుణాలవాల సురేశ్వరా

కుజన జన సంహారా గురుదైవమా శరణందురా

గజవసనుడా శంభో కరుణించు నిత్య సురక్షితన్.37

తిరుమల నివాసా నాతిని గాచినావట మాధవా

కరివరదుడా శ్రీశా కనుపించవేల రమాధవా

సరసహృదయా దేవా సరసాలు చాలుర మాదవా

గరుడ గమనా దేవా కరుణించు నిత్య సురక్షితన్.38

గిరిజ పతివైనా వాకిట నందితో యడుగేయరా

కరి వసనమేలా శ్రీ కర పట్టువస్త్రములిచ్చెదన్

వరద నగజానాధా పరమేశ వేగమె ప్రోవరా

స్మరహరుడయంచున్ నామము దల్చు నిత్య సురక్షితన్.39

14)

ధృతవిలంబితము, హరిణప్లుతా

నభభర-7

సుజనులుందరి చూజెడి శాంభవీ

విజయమీయవె విద్యల తల్లివై

భజనజేసెద పద్యము లీయవే

నిజము బల్కెడి నిత్యసురక్షితన్..40

ప్రకటమైన స్వభావము గూర్చితిన్

చకచకా నిను సన్నుతి చేసితిన్

నికము బల్కుచు నీపద మంటగన్

నికటమయ్యెను నిత్య సురక్షితన్.41

అలుకలుండెడి యానగు‌మోమునన్

లలితమౌనని రాముడు బల్కగన్

చిలుకు నవ్వులు చెంగట బట్టగన్

నిలచె చెంతనె నిత్య సురక్షితన్.42

15)పద్మసద్మ

రస నజ నభ ర-12

కొండకోనల దోగు చిగురుటాకు తనివి దీరగ నవ్వగన్

గండు కోయిల పాడగ తనరాక తెలుపగన్ మధు మాసమున్

దండిగా జడివాన తడుపగన్ తపనలు దీరగ స్వామి కో

దండరాముని దర్శనము విధాతనడిగె నిత్యసు రక్షితన్.43

వెండివెన్నెల పూచె చిగురుమోవి మురళిపై తగి లించగా

మెండుగా రసవాహిను లెదపై‌ మెరిసెను గాన సుధాం బుధిన్

ఖండితమ్ముగ దెల్పగ తనరాక గమకముల్ పలికింప పూ

దండ వేసెడి భాగ్యమును విధాతనడిగె నిత్యసు రక్షితన్.44

కొండపై కొలువా! తిరుమలపై! కుదురుగ నుంటివి దేవరా

రండు రండని బిల్చెదొ కలికాలము వరదా నిను చేరగన్

గుండెలో నెలకొంటి వనిరినిన్ గురుతెరుగన్ గరు ణించరా

యండగా నిలుచుండమనుచు నిన్నడిగెను నిత్యసు రక్షితన్.45

16) పల్లవరి( భభభభర-7

రామునివా మరి రక్షణ నీయవు న్యాయమా

కామము క్రోధము కాళ్ళను జుట్టెను పాములై

ప్రేముడి బిల్చెద వేదన దీర్పగ వేడెదన్

కాముని తండ్రివి కావవె నిత్య సురక్షితన్.46

రామ సుధాకర క్రన్నన ప్రోవగ వేడెదన్

రామ దయాకర రాజలలామ సురేశ్వరా

రా మహనీయ పరాత్పర జానకి తోడుగన్

నామదినుండ సనాతన నిత్య సురక్షితన్.47

రమ్మని గోరితి రామ దయాకర రక్షకై

సమ్మతి నీయవె సన్నుతి చేసెడి పద్యముల్

కమ్మగ వ్రాసెద క్రన్నన నిన్ను నుతించుచున్

నెమ్మది నీయవె నీదయ నిత్య సురక్షితన్.48

17) పిపీలిక (మమ తర జభర- 9,15)

మాయా లోకంబందున్ బేలా మహానుభావులున్ మహా మహితాత్ములున్

సాయంబందింపంగా నీకై సదా సుధారసం బులన్ గురిపించగన్

నీయాత్మన్ సత్సాంగత్యంబున్ నికామము న్నిదాన మైన పథంబునన్

ప్రాయంబున్ దార్డ్యంబౌ మేనున్ రమాధవున్ భజింప నిత్యసు రక్షితా.49

శ్రీ మాతాయంచున్ సత్యంబౌ శివాణినిన్ శెనార్తితో పదమంటగన్

శ్రీ మాతా యంచున్ నిత్యంబా చిదాత్మనున్ సదా చిరాయువు గోరుచున్

శ్రీ మాతా నీవే దిక్కంచున్ శ్రియమ్ము నెంచి వాసిగా విరులీయగన్

శ్రీ మాతే రక్షించున్ గా   కాశివాసమిచ్చి దాసి నిత్యసు రక్షితన్.50

శ్రీకాళేశా! నీవేలా! హస్తి వల్క పాత గోచి !ముంచవు గంగలో

శాకంబుల్ లేవా యేణీ మంసమేల నీకు! బిచ్చ మెత్తుట పాడియా

శ్రీ కైలాసంబేమాయెన్ కాశియో! శ్మశానవాసివైతివి న్యాయమా!

చేకొమ్మా నాసర్వస్వంబున్ శివానిపాద దాసి నిత్య సు రక్షితన్.51

18)ప్రగుణీకృతా (నభభభర-10)

తలచినంతనె క్షేమము దత్తుడు గూర్చు సురక్షితా

కొలచినంతనె దత్తుడు కూరిమి సంపదలీయడా

నిలచిచూడుము చెంతన నీదయ యంచును భక్తితో

తలచిచూడుము నిత్యము దత్తుని నిత్యసురక్షితా.52

అలలు గావవి కోర్కెలు హ్లాదము గూర్పువు సత్యమే

కలలు రాలిన రాత్రులు కల్లలు చేయును వేకువన్

తలపులందున తల్లిని తండ్రిని నిల్పి సభక్తితో

తలచిచూడుము దత్తుని తప్పక నిత్యసురక్షితా.53

వలపువాకిటనిల్చిన వేదనబెంచును సత్యమే

మలచికొమ్మని దత్తుని మేలగు జీవన మీయగన్

పిలచుచూడుము దత్తుని ప్రేమము నిల్పి సభక్తితో

బలిమినిచ్చును దత్తునిపాదము నిత్యసురక్షితా.54

19) ప్లవంగమః (భభతభర-9)

రామ సుధాకర రారా రమాధవ వేడెదన్

రామ దయాకర రావేర శంకర సన్నుతా

రా రణధీర సుధీరా ప్రభాకర శోభలన్

కామన దీర్చుచు కావంగ  నిత్య సురక్షితన్.55

పాదములంటెదరా రావణాసుర మర్థనా

నీదయ కోరితినాపన్నివారణ చేయగన్

హ్లాదము గూర్చవయా మాయ మోహము ద్రుంచుచున్

బేధములెంచకుమా కావ నిత్య సురక్షితన్.56

లేదని చెప్పకయా వేడెదన్ కరుణింపగన్

నీదయ కోరితినాపన్నివారణ చేయగన్

హ్లాదము గూర్చవయా మాయ మోహము ద్రుంచుచున్

పాదములంటెదరా దేవ నిత్య సురక్షితన్.57

20) భీకర (భయజజభర-11)

దాశరథి భద్రాచలమ్మున తల్లితో నెలకొంటివా

దాస జనపోషా త్వదీయ పదాంబుజమ్ముల నమ్మితిన్

పాశములలో జిక్కుకుంటిని పాదదాసిని బ్రోవరా

నీ శపథమేమాయెరా కరుణించు నిత్య సురక్షితన్.58

ఆకసముపైనాకమందున హాయిగా నెలకొంటివో

లోకముల నీలోన యుండగ లోకులందురు నుండగన్

నీ కనుల ముందున్న వారిని నీవు గాంచవు న్యాయమా

నీకథలనే పాడెదన్ కరుణించు నిత్యసురక్షితన్.59

నీ మురళి గానామృతమ్మున నీరమై ప్రవహించనీ

నీ మధురమౌ మోవిపై కమనీయ రాగము నౌదునా

నా మనవినందించనా కరుణాలవాల రమాధవా

నీ మనసులో నుంచుమా కరుణించు నిత్య సురక్షితన్.60

21) మణిభూషణము( రనభభర-10)

  రమణీయక, సుందర, ఉత్సర, మణిభూషణశ్రీ) నూతనం

పాపరాశిని దహించెడి పాదములంటెదన్

రేపుమాపని తలంచక రేడు రమాధవున్

కోపతాపములబెంచెడి కోర్కెల ద్రుంచగన్

నీపదమ్ముల భజింతును నిత్యసురక్షితన్.61

కాలకాలుడు వసించెడి  కాశిపురమ్మునన్

కాలభైరవుని మ్రొక్కగ కాశిపురమ్మునన్

ఫాల లోచనుని గొల్చిన పాపములంటునా

నీలకంఠుని భజింతును నిత్యసురక్షితన్.62

కాశికాపురము నందున గంగను మున్గుచున్

కాశికాపురము నందు సకాలము నందునన్

కాశినాథుని భజింపగ కావగ భక్తులన్

నీసమానమెవరందును  నిత్యసురక్షితన్.63

22)మణిహంసా  699 మనోహంస 700 మానసహంస  రణహంస   

 సజజభర-10

జడగట్టెజుట్టు చాలును స్నానము శంకరా

గుడిగట్టినీకు చేసెద కూరిమి పూజలన్

మడిగట్టి వంటచేసెద మాంసము మానుమా

నిడిగాలి దీపముంచెద  నిత్యసురక్షితన్.64

తడగట్టు గట్టెదన్ నెలతాలుపు చాలదా

తడవాడుచుండె పాములదండలు శంకరా

తడిలేని వస్త్రమిచ్చెద తాండవమాడగన్

నిడిగాలి దీపముంచెద  నిత్యసురక్షితన్.65

తడగట్టు= పాముల మంత్రము

తలపైన గంగతో శివతాండవమేలరా

వలిచేయుతీయరా భవ పాముల దండలన్

తలపైన నిల్పరాహర దండము బెట్టెదన్

నెలదారివందురే  దొర  నిత్యసురక్షితన్.66

23)మత్తవిలాసినీ, కవిమయూర

భభభభభభర-13

శంకర శ్రీ కర సాంబసదాశివ దండము సాధుజ నావనా

కింకరులన్ కరుణించవె చండుడ క్ష్వేళగళుండని గొల్చెదన్

శంకలు దీర్చవె పాదములంటెద సాంబదిగంబర ప్రోవరా

నెంకెఱజేయక దర్శనమీయవె నీదయ నిత్య సురక్షితన్.67

కాశిపురాథిప కామితదాయక కావరవేగమె శంకరా

దాసుల బ్రోచెడి చండుడవీవయ దండము భక్తవ శంకరా

పాశవిమోచన పాదములంటెద భస్మవిలేప శుభంకరా

నీశుభనామము నిత్యము బల్కెద నీదయ నిత్య సురక్షితన్.68

  

మోదకహస్తుడ డుంఢివినాయక ప్రోవర విఘ్న వినాశకా

మోదముగూర్పర సాక్షిగణేడుడ మోహన రూప వినాయకా

పాదములంటెద పాశముదీయర  బాలగణే శుడ కావరా

నీదయ గోరితి విద్యలనీయగ నెమ్మది నిత్య సురక్షితన్.69

24)మదనోద్ధురా / ఉత్సుక (భభర)

దేవకినందకుమారుడా

దీవెనలిచ్చిన చాలురా

పావన నామము పాడెదన్

బ్రోవర నిత్యసురక్షితన్.70

రావణ దర్పవినాశకా

రావయవేగ రమాధవా

సేవలనంద జనార్థనా

కావర నిత్య సురక్షితన్.71

కావలి యుంటిని వాకిటన్

పావనదర్శన మీయరా

త్రోవనుజూపగ రావయా

నీవయె నిత్య సురక్షితన్.72

25)మధుమల్లీ (సభర)

వినుమా నామొర శ్రీధరా

మనసారా నిను గొల్చెదన్

మనసేనీదని తెల్పెదన్

కనుమా నిత్య సురక్షిత న్.73

నరసింహా శరణంటి ని

న్నరయంగా దరిజేరితిన్

కరుణింపన్ దరిశించెదన్

వరదా నిత్యసురక్షితన్.74

నరసింహా కనుపింపవా

నరసింహా దరి జేర్చవా

నరసింహా కరుణించవా

త్వరగా నిత్యసురక్షితన్.75

26) మనహంస (తజజభర-10)

సాకేతపురాథిప రాక్షసమర్థనా శరణంటిరా

లోకాన పరాత్పరుడెవ్వరు భక్తులన్ కరుణించగన్

లోకంబుల సుందరుడెవ్వరు రావణాసుర మర్థనా

నీకేతన మెత్తెద దాసిని గాన నిత్యసురక్షితన్.76

యాదాద్రి విభో శరణంటినయా దయాకర బ్రోవరా

వేదాద్రి నివాసుడ వేదవిహార వేదన దీర్చరా

పాదమ్మల నమ్మితి భక్తవశంకరా కనుపించరా

నీదాననురా పరమేశుని దాసి నిత్యసు రక్షితన్.77

రామా రఘునందన దాశరథీ దయాకరు డంటిరే

రామా యినవంశజ రాజలలామ దైత్యవినాశకా

రా మాధవ కేశవ కావర భక్త రక్షణ చేయవా

రా మాయిలవేలుప బ్రోవర నన్ను  నిత్యసు రక్షితన్.78

 

27)మనోజ్ఞ  -కలభాషిణి- నవనలిన   అరవిందక   

నజజభర-10

శరణము రాఘవ రాక్షసమర్థనా పదమీయవా

సురముని వందిత సర్వశుభంకరా మరుగేలరా

వరసుగుణాకర దానవసంహరా కరుణించరా

నిరతము నమ్మిన దానని గాన నిత్యసురక్షితన్.79

హరహర శంకరరార హరోంహరా యని బిల్తురా

సురముని పూజిత మౌళి సుధాకరా వరమీయరా

పరమదయాకర రామపదార్చితా శరణంటిరా

తిరముగ బ్రోవర పార్వతి నాథ నిత్యసురక్షితన్.80

హరిహరసూనుడ దైత్యహరా దయాకర ప్రోవరా

గురుగుహ మూర్తివిశంభుకుమార దేవసుధాకరా

శరవణ పాలిత స్వామి షడాననా కరుణించరా

తిరముగ నుంటివినామది నీది నిత్యసురక్షితన్.81

28) మయూవదనా (భజజభర-9)

భద్రగిరి వాసుడ రావణాసుర మర్థనా

రుద్రుడవు నీవుర దారుణమ్మును గాంచరా

క్షుద్రమగు జీవుల నీకు గుర్తును తెచ్చితిన్

భద్రమున గూర్పగరావ  నిత్యసురక్షితన్.82

పాదములనీయర కావరావయ శంకరా

వేదముల నేర్వను నీ విధానము నేరనే

నీ దయను గోరితి మౌనినైనను గానురా

చేదుకొన గోరితిదాసి  నిత్యసురక్షితన్.83

రామ యను నామము తారకమ్మని యందురే

రామ యని యంటిని జాలమేలరమాధవా

రామసుగుణాకర తాళలేనుర కావరా

క్షేమ మిడ గోరితి దాసి  నిత్యసురక్షితన్.84

29) రాధికా (సభభర-7)

మదిలో శంభు నుమాపతి దల్చుచున్

మదియే యీశుని మందిరమై హరా

పదిలమ్మౌనిక పాదము లంటగన్

నిధులే గోరని నిత్యసురక్షితన్.85

అదివో వేకువ యంబరమంటగన్

నదిలో కాంతులు నాట్యము లాడగన్

కదిలే యూహలు కాంతుల నింపె నా

నిధులే యన్నది నిత్యసురక్షితన్.86

సుధలే చిల్కెడి సుందర దృశ్యముల్

విధి తా వ్రాసిన ప్రేముడి చిత్రముల్

మదిలో నిండెను మాధవ డుండు స

న్నిధిలే యన్నది నిత్యసురక్షితన్.87

30) లలితా (ననమతభర-12)

కరివరదుడ రారా దేవా శ్రీ కరా కరుణించరా

గిరిధర దొర రారా కృష్ణా చేకితానుని నేస్తమా

సిరిపతి దొర  రావేరా నీ దాసినే నను బ్రోవరా

మొరలను వినవేరా రామా దాసి నిత్యసు రక్షితన్.88

కరివసనుడ రారా దేవా శ్రీ కరా కరుణించరా

గిరిజనుగొన లేదా రారా చేకితానుడ గావరా

సిరులను వరమీరా యీశా నా చికాకుల ద్రుంచరా

మొరవిని పరమేశా రారా వేచె నిత్యసు రక్షితన్.89

పగటి వెలుగులందించేవా దేవరా కరుణించరా

అగణిత గుణశీలా దివ్యాంశా! యజంభుడ! బ్రోవరా

గగనమణివి మార్తాండా దేవా గభస్తివి దేవ నీ

నగవులు గన దర్శింతున్ నీదాన నిత్యసురక్షితన్.90

31) వాంధర/యూథికా/యురీకా (రనభర-7)

నాది నాదనుచు నాటకమాడితి

న్నేదినీదనగ నేమని చెప్పెదన్

నీది నాదనను నీ దయ నీయవా

నీదుపాదముల నిత్యసురక్షితన్.91

అందమైనవని యర్రులు జాచితిన్

పొందరానివని పోరును చేసితిన్

సందియమ్మువిడ సన్నుతిజేసెదన్

నిందజేసితిని నిత్యసురక్షితన్.92

దూర రానిదట దుష్కరమైన సం

సారసాగరము సన్నుతి చేసెదన్

చేరవచ్చితిని చెంతన నిల్చెదన్

నేరమెంచకుము నిత్యసురక్షితన్.93

32) విభ్రమగతి(మసజసతతభర-13)

శ్రీ రామా రఘునందనా దశరథా సీతమ్మనే జూచితిన్ జని లంకకున్

క్రూరుండాతడు రావణాసురుడుతా ఘోరాతి ఘోరమ్ముగా చెరబట్టెరా

పారావారము దాటి చూచితిని నీపాదమ్ములే నమ్మి రోసెడు జానకిన్

రారా వేగమె లంక కేగెదమురా రక్షింప మాయమ్మ  నిత్యసు రక్షితన్.94

సీతామాతను జూడనేగెదను నే శీఘ్రమ్ముగా లంక నంతయు చూచెదన్

పాతాళమ్మునకేగి జూచెదను నేపాథోధిలో జూచెదన్ వినువీధిలో

మా మాతన్ కనుగొందునే రయముగా మాతండ్రి  సంధించగా శరమయ్యెదన్

రామా  వేగమె లంక కేగెదను సం రక్షింప మాయమ్మ  నిత్యసు రక్షితన్.95

ఎన్నోరాత్రులు జారిపోయినవి నేనిన్నెట్లు వీక్షింప చేరెద నాథుడా

నిన్నా బంగరు జింక తెమ్మనుచు నేనే పంపితిన్ న్నా థుడా కరుణింపరా

యెన్నోయెగ్గులు లక్ష్మనున్ బలికితిన్యిక్కట్లబాలైతినే మని చెప్పెదన్

మున్నీ దైత్యుడు రావణారి చెర నన్నోముంగ  రమ్మందు  నిత్యసు రక్షితన్.96

33)శంబర(నభ భర నభ భర-7/12)

శరణమంటిని శంకరదేవ శాశ్వతుడ కావర పార్వతి నాథుడా

శరణమంటిని సాంబమహేశ సాధనము చేసెద నాట్య విశారదా

శరణమంటిని సాధుశరణ్య  చాలునిక కావర శ్రీ పర మేశ్వరా

శరణమంటిని శర్వుడ శార్ఙ్గి సంగ్రహుడ బ్రోవర నిత్య సురక్షితన్.97

కరుణజూపర శంకరదేవ కారణుడ కావర పార్వతి నాథుడా

మరణమన్నది మాయర దేవ మా మదిని నిల్వర నాట్య విశారదా

తరుణమైనది తప్పదు బ్రోవ దాసులను  కావర శ్రీ పర మేశ్వరా

శరణమంటిని శాంఖ్యుడ రార  సంగ్రహుడ బ్రోవర నిత్య సురక్షితన్.98

చరణమంటెద శంభునిజేరి సంయుతుడ కావర కాశి పురాథిపా

వరములీయర పార్వతినాథ పాదముల బట్టెద నాట్య విశారదా

గిరిజనాథుని కీ ర్తనచేసి క్ష్వేళగళుడాయని గానము చేసెదన్

తరుణి నైతిని దాసినిగాన దాతవని మ్రొక్కెద  నిత్య సురక్షితన్.99

34) సహేలికా (జభర)

హరోంహరాయని దల్తురా

గిరీశ కావర దేవరా

సురేశ సన్నుత బ్రోవరా

స్మరించు నిత్యసురక్షితన్.100

వరాలనేమియు గోరరా

సరాగమాలలు వైతురా

పరాకు జూపక వేగరా

వరించు నిత్య సురక్షితన్.101

సరేగదా యని యన్నచో

సరాసరి యటు వచ్చెదన్

శరీరమే తమ దౌనురా

వరించు నిత్య సురక్షితన్.102

35)హరణీపద. (నస మత భర-11)

కరివరదుడా గోవిందా నీకన్న దిక్కెవరందురా

గిరిధర దొరా రాధా కృష్ణా కేలుమూడ్తును శ్రీ ధరా

సిరిపతి దొరా  రావేరా రక్షింపరా నను బ్రోవరా

మొరల వినరా చూపించన్ నీ మోము నిత్యసు రక్షితన్.103

శరవణభవా  శ్రీ స్కందా నీశక్తి తో నను బ్రోవరా 

హరిహరసుతా యయ్యప్పా నీయందమే కను విందురా

గురుగుహ! కుమారా! షడ్వక్త్రా!కూర్మితో మము కావరా

వరద శుభదా సుబ్రహ్మణ్యా! దేవ! నిత్యసు రక్షితన్.104

కరివదన దేవా విఘ్నేశా కావరా కరుణించరా

సరియెవరు లేరయ్యా విఘ్నేశా నమామి వినాయకా

వరములిడగా హేరంబా రావయ్య పార్వతి నందనా

చిరునగవులే చాలయ్యా! నీదాసి! నిత్యసు రక్షితన్.105

36)హాసాస్య(జరభర-7)

పరాకు చాలురా పార్థన చేసెదన్

సరాగమాడగన్ సాధ్యము కాదురా

వరాల మాదొరా పాదము లీయరా

నిరాకరించకన్! నిత్యసు రక్షితన్.106

పదామ్మునంటుచున్ పార్థన చేసెదన్

సదాశివా హరా కావర దేవరా

సుధాకరా శివా సుందర బ్రోవరా

నిదానమేలరా! నిత్యసు రక్షితన్.107

మహేశ్వరా దొరా మన్నన  చేసెదన్

మహాశివా హరా మాయను ద్రుంచరా

విహారివై సదా వెన్కను రావయా

నిహార మైన నీ నిత్య సురక్షితన్. 108

స్వస్త్.

  

 

  

  

  

 

  

  

 

 

  

 

  

  

  

 

  

  

  

 

 

 

 

 

 

 

మాఘ పురాణము

 

మాఘ పురాణము పదిహేడవ అధ్యాయము.

మాఘ పురాణము (పదిహేడవ అధ్యాయము)

ధర్మమార్గము జూపవచ్చిన దత్తదేవుని దల్చెదన్

కర్మలన్నియు ప్రోదిజేసెడి కార్యకారణ రూపుడౌ

నిర్మలాత్ముడు దత్తదేవుని నీడయందున నిల్చెదన్.

మర్మమించుక దెల్పమందును మాఘ మాసము శ్రేష్ఠతన్.

శుకమహాముని మార్కండేయుడు మృత్యువును జయించెనని జెప్పగా పరీక్షిత్తు "ఓ మహాత్మా" ఆ వివరమును దెల్పని ప్రార్థించెను.‌

తరళము.

వినుము పాండవ పౌత్రుడాయని వేద్యుడౌ శుక మౌని‌తా

ననునయంబుగ జెప్పెనా కథ, నారుమాసము లాయు వే

తనకు దక్కెనటంచు బల్కు విధాత దిక్కని చెప్ప నా

ముని మృకండు మరుద్వతుల్ విని మూర్చ నొందిరి యక్కటా.

తరళము.

తనయుడా నిను చూడకుండిన దక్కునా మరి ప్రాణముల్

మనిసిజానుని వైరి గొల్వగ మాకు దక్కిన పుత్రుడా

తనయుడుండని యింటివారికి దక్కునా సుఖ సౌఖ్యముల్

తనయుడే గద వెల్గునిచ్చును తల్లుదండ్రుల కళ్ళకున్.

మ.కో

ఎన్ని నోములు నెన్ని పూవుల నెన్ని పూజలు సల్పుచున్

యెన్ని దీక్షలు బట్టినామయ నెన్నినాళుల నిష్ఠతో

నిన్ను పొందిన భాగ్యమేమరి నీలకంఠుని మ్రొక్కగన్

కన్న తండ్రివి నిన్ను గంటిమి కాలకంఠుడు మెచ్చగన్.

తరళము.

సుతులు లేని గృహంబులున్ మరి సూర్యు డుండని బవ్వలుల్

శతమయూఖుడు లేక శూన్య ఖజాక మందురు చూడగన్

సుతులు లేకయె లోక ధర్మము శూన్యమై గతి తప్పునే

సుతులు గల్గిన వారికే పలు సూనృతంబులు దక్కనే.

తరళము

మునుపు బ్రాహ్మణ సొత్తు దోచగ మోసగించి న వాడనా

పెనగి బిడ్డను తల్లుదండ్రుల  వేరు చేసిన పాపినా

మునుకు యాకొని యున్న వానిని పొమ్ముపొమ్మను  దోషినా

యని మృకండుడు చింతనొందెను నబ్బురంబుగ దోచెనే.

గీ.

దేవతలనింద యతి నింద తెలివి దప్పి 

ప్రాణ నిందను జేసిన పాపి నగుదు,

సాధుజనులను తెలియక బాధపెట్ట

పూర్వజన్మల పాపము ముందు నిలచె

ననుచు నామృకండు మహర్షి యలమటించె.

మ.కో.

పిల్లవాండ్లను తల్లుపాలకు వేరుచేసిన పాపినో

పిల్లతల్లుల జూసి యీసును పెంచుకున్న విమోహినో

ప్రల్లదంబున ప్రక్కటిండ్లకు బాఱితో యని నేడ్చెనా

తల్లిచెంత మృకండు సూనుడు ధైర్యమించుక జెప్పెగా.

వచనము

కుమారా నీకు మరో ఆరుమాసములే ఆయువని చింతించు తల్లిదండ్రులను జూచి ఆ మార్కండేయుడు ఇట్లనె. 

తరళము.

సవినయంబుగ బల్కెనిట్టుల శాంతచిత్తము నందునా

శివుని మెప్పును బొందినారలు చింత నొందుట న్యాయమా

భవుని గొల్చెద నాయువిమ్మని భార మంతయు వేసెదన్

యెవని కైనను నాయువిచ్చెడి ఈశుడుండెను దిక్కుగా.

మ.కో

ఆరుమాసము లందుదీరెడి నాయువున్నది చాలదా

కారుచీకటి పార ద్రోలెడి కాలకంఠుడు దిక్కు నే

చేరి మ్రొక్కెదనీశునే మరి శ్రీ కరంబగు  దీప్తికై

మీరు చింతలబోకుడంచును మించి బల్కెను పుత్రుడే.

వచనము.

అనవుడు మృకండుడు తన కుమారుని జూచి ఇట్లనె. "పూర్వము సిధ్ధజనార్థన క్షేత్రమని నేడు కోటిఫలి (కోటిపల్లి) యను క్షేత్రము" గౌతమీ తటిన గలదు. అచటకేగి మృత్యుంజయునివి కమ్మని దీవించి బంపిరి.

మ.కో

గౌతమీతటి నందు గొప్పది కాలకంఠుని క్షేత్రమే

భూతనాథుని చేరి గొల్చిరి మున్ను మౌనులు తాపసుల్

శ్వేతకేతుని రక్షజేసెను జింకతాలుపు మున్నిటన్

చేతనత్వపు కోటిపల్లికి చేరుకొమ్మిక పుత్రుడా

మానిని.

సిధ్ధజనార్థన క్షేత్రము కేగుము సిధ్ధులు మున్ను వసించిరటన్

బుధ్ధిగ జేసిన పూజఫలించగ పూర్వము చెప్పిరి భూసురులున్

ఒద్దికగావిని ఓయని బల్కుచు నూరిని వీడెను నోరిమితో

సద్దును జేయక సాగెసతర్కుడు సాధ్య ఋషీవర సాధనకై.

ఆ పుణ్యగౌతమీ తీరానికి చేరిన  మార్కండేయుడు.

మానిని

తానొక లింగము స్థాపన జేసెను ద్రాపుని గొల్వగ  తాపసియై

పూనికనొందెను పూలను పత్రిని పూజకు గూర్చెను భూసురుడే

మానసపూజ నుమాపతి గొల్చెను మాపని రేపని మానకనే

దీనజనావన దేవరకావర దిక్కువు నీవని దీనముగా.

మానిని.

నామము బల్కెద నామది నీదిగ నాయువు నీయవె నాకు శివా,

నీమము దప్పక నీపద మంటెద  నీదయ కోరుదు నింకశివా,

కాముని గాల్చిన కాలుడవైతివి  కామన సేసెద కావుమయా,

నామది వీడకు నాదవిలోలుడ నాట్యవిశారద నాగశివా!

వచనము.

ఇక ఆ మార్కండేయునికి పదహారేండ్ల వయసు పూర్తి కావచ్చింది.

అంత విధాత దేవతాదులతో కూడి పరమేశ్వరుని చేరి తాను అనాలోచితముగా మార్కండేయుని చిరంజీవ అని దీవించిన వైనాన్ని భక్తితో తెల్పి, ఆ మృకండు సూనుని  కరుణించి చిరంజీవిని చెయ్యమని ప్రార్థించారు. 

మ.కో.

అంతనా విధి దేవతాదులు నంతకాంతకు గొల్వగా

చెంత నిల్చిరి చేరి మ్రొక్కిరి చెప్పిరాకథ నంతయున్

సంతసించి మృకండు సూనుకు చాలనాయువు నిచ్చెతా.

చింత దీర్చెద పోయిరండని జింకతాలుపు చెప్పెగా.

వచనము.

మాఘశుధ్ధ పంచమినాటికి మార్కండేయునికి పదారేండ్లు నిండినవని వాని తెమ్మని యమధర్మరాజు భటులబంపెను.

మానిని

కాలము తీరగ కాలుని భ్రుత్యులు గాలము వేయగ గాంచితిరా

బాలుని జేరగ బాలుడు జూచెను బాఱెను మందిర ప్రాంగణమున్

కాలుని భ్రుత్యులఁ కాదని చెప్పిరి  గౌపతి భ్రుత్యులు గాచిరిగా,

కాలుని భ్రుత్యులు కాదని చెప్పగ కాలుడు జూపెను కావరమున్.

వచనము.

ఈ బాలుని బట్టుట మా వల్లకాదని భ్రుత్యులు చెప్పగా మాఘశుధ్ధ సప్తమి (రథసప్తమి) నాటికి కాలుడే స్వయంగా వచ్చెను క్రుధ్ధుడై.

మ.కో

కాలుడొచ్చి మృకండు సూనుని కాలమా యెను రమ్మనెన్

పూలు దెచ్చి పురారి గొల్చుచు పూజసేయుచు నుండెనా

బాలుడత్తరి కౌగిలించెను పంచవక్త్రుని నార్తితో

తాళుమోప్రభు పూజచేసెద తాళివచ్చెద నన్ననూ.

కాలుడాగక పాశబధ్ధుని కావరమ్ముగ జేసెగా

శూలపాణియె క్రుధ్ధుడాయెను సూటి తాపును తన్నగా

కాలుడత్తరి మూర్చనొందెను కాలమాగెను వానికిన్

కేలుమోడ్చిరి చేరి మ్రొక్కిరి గిబ్బ రౌతుదయా మయున్.

ఫెళ్ళెఫెళ్ళెను దిక్కులన్నియు  పెద్ద శబ్దము నిండెగా

సుళ్ళుదిర్గెడి వింతవెల్గులు శూలపాణిని జుట్టెగా

కళ్ళు దిర్గిన కాలుడప్పుడు కాంకమందిన వానిగా

త్రుళ్ళిపోయెను కాలుడత్తరి దొర్లిపోయెను భీతితో.

శ్రీలుగూర్చును మాఘమాసము శ్రీకరమ్ములు నిచ్చుతన్

పాలు బిల్వము గంగనీటని పార్వతీశుని కిచ్చుచున్

నీలకంఠుని లోకచక్షుని నిష్ఠతో నుతి జేయగన్

మేలుమేలని పెద్దలందరు మించి చెప్పిరి మున్నిటన్.

బాలుడీతడు నన్నుగొల్చెను భక్తిమీరగ కాలుడా

కాలపాశము నాకు వానికి కావరమ్మున వేసితో

చాలు చాలును తెంపరీ నిను చావదన్నిన మేలగున్

కాలకంఠుని నేనుదల్చిన కాలమెట్టుల తీరురా?

వచనము.

అలా ఆ కాలకాలుడు కాలునికి బుధ్ధిచెప్పి బాలుడైన మార్కండేయుని రక్షించి చిరాయువునిచ్చినది ఈ మాఘమాసము నందేనని ఆ శుకబ్రహ్మ పరీక్షిత్తుకు వివరించెను.

స్వస్తి.

ధన్యవాదములు.

నమస్కారములు.

నాకు ఈ అవకాశము మరోసారి కల్గించినందుకు మీకు సదా కృతజ్ఞతలు తెల్పుతూ,

భవదీయుడు.

లంక శివరామకృష్ణ శాస్త్రి,

కుషాయిగుడ-500062

హైదరాబాదు.

10/02/2021

కరోనాయను హాలాహలోపాఖ్యానము

కరోనాయను హాలాహలోపాఖ్యానము

పూర్వం దేవదానవులు మరణాన్ని జయించడానికి  అమృతపానము మేలని దాని కోసరం క్షీరసాగర మధనం చేశారు. ఆకథ మీకు తెలుసినదే. దానిని స్పూర్తిగా తీసుకొని వ్రాసిన వృత్తాంతము. ఎవ్వరిని నొప్పించాలని కానీ ఎవ్వరిని కించపరచాలని కానీ నాకు లేదు. సరదాగా తీసుకోవాలని విన్నపముతో. 🙏🙏

@@@@@@@@@@@

ఈ కలియుగం లో మానవులు

ఈ భూమి 🌎🌍🌏 మీద చిరకాలం నివసించాలని మరణాన్ని కష్టాలను  జయించాలని పరిపరి విధాల ఆలోచించి ఆలోచించి🤔 తపించి  ఈ మరణాన్ని జయించాలన్నా తమకు కలిగే రకరకాల కష్టాలు తొలగాలన్నా సుఖంగా ఉండాలన్నా తమకు ₹₹₹₹ *ధనసంపాదనమే* దిక్కని, *ధనమూలం మిదం జగత్తని* 

యోచించి బీదా బిక్కీ అనే తేడాలేక ధనిక 🇧🇸 పేద దేశాలనే తేడాలేక 🇦🇽🏴‍☠️ ప్రపంచమంతా ఏకతాటిపై నిలచి *కష్టాలనే* సముద్రాన్ని చిలకడానికి తయారయ్యారు. దానికి *స్వార్థమనే*🌋⛰️🏔️ పర్వతాన్ని ఎంచుకొని *మోసమ* నే సర్పాన్ని🐍🐍 చుట్టి చిలకడం ప్రారంభించారు. కలిపురుషుడు కూడా ఈ *భారాన్ని* తన వీపు   మోయడానికి ముందుకొచ్చాడు. 

ఈ మహత్కార్యంలో దేవతలెవరో 😇 దానవులెవరో👺👺 అనే సందేహము వలదు. ఇదే

ధర్మ మార్గంమని చాటుకుని పూజలు, జపాలు, వ్రతాలు, ప్రార్థనలు నోములూ, హోమాలూ వగైరా వగైరా  చేసి (దేవతలు) ధనార్జన చేసే వారొకప్రక్కా, మోసాలూ, ద్వేషాలు, కల్తీలూ, మారణహోమాలు చేసే (దానవులు) మరో ప్రక్కా ఉన్నారు.

అలా చిలకగా చిలకగా మొదట్లో *ఉద్యోగా* లొచ్చాయి, *వ్యాపారా* లొచ్చాయి, రకరకాల *మోసాలొచ్చాయి*  కొందరవీ కొందరివీ పంచుకున్నారు.

 *ఇదంతా విస్మయంగా చూస్తున్నాడు సర్వాంతర్యామి అయిన ఆ శ్రీ హరి.*😕😕😕☹️

ఇంకా చిలకగా ధనసంపాదనకు రకరకాల దారులు గోచరమయ్యాయి మానవులకు.

*పాలల్లో నీళ్ళు కలపొచ్చని*

*బియ్యంలో రాళ్ళు కలపొచ్చని*  

*కల్తీ/ నాసిరకం సరుకులు, మందులు*తయారు చేయొచ్చని,*

 *షేరుమార్కెట్లు పెట్టి జనాల ఆస్తులు క్షణాల్లో కొల్లగొట్టచ్చనీ*

*ఖర్చు తగ్గించుకొని* *ఆదాయాన్ని పెంచడానికి* మామూలుగా దొరికే కోళ్ళు🐓🐓, 🐰🐰కుందేళ్ళూ 🐟🐠 చేపలే 🦙🐑 మేకలూ గొర్రెలే  కాక

🐸🐸 కప్పల్ని,🐛 వాన పాముల్ని, 🐍 పాముల్ని, గబ్బిలాయిలని,🦇🦇 తేళ్ళని🦂🦂, ఎలకలని 🐀🐁, బొద్దింకలని, రకరకాల క్రిమికీటకాలను🐝🐞 తినొచ్చని కొందరు తేల్చారు.

కం.

*గబ్బిలము కప్ప తేళుల*

*సుబ్బరముగ తిన్నవాని చోద్యము గనరే!*

*యబ్బుర మాయెను జగతికి*

*యబ్బాబ్బా యీకరోన నంటించనయా*

ఏవేవో ఇలాటివే రకరకాల దారులు ధరార్జనకై తెరుచుకున్నాయి. 

ఇదే అదనుగా *కలి పురుషుడు* విజృంభించి తనూ తన ప్రభావాన్ని ప్రతాపాన్ని చూపించి ప్రజలకు ఆదాయమార్గాలు చూపించాడు.

కం.

*అప్పుడమిపైన నప్పటి*

*కప్పుడు గిరి కష్టములను క్రమ్మగ ద్రిప్పన్!*

*చప్పుడునిండె నజాండము*

*చెప్పెడిదే మజుని చెవులు చిందర గొనియెన్!*

ఇలా కష్టాలనే పర్వతాన్ని చిలుకుతుంటే ఆ బ్రహ్మగారికి ఆశ్చర్యం కలిగి చెవులు చిల్లులు పడ్డాయట....🥵

ఆ చిలకడమనే మహత్కార్యంలో  కష్టములనే గిరిని తన వీపుపై మోసిన కలిపురుషుని తీటకూడా తీరలేదట!!

కం.

*ఈలీల కష్టముల నవ*

*లీలగ జిలుకె సురలసుర లేర్పడ గనుమా!*

*కోలా హలమై చివరకు*

*హాలా హలమను కరోన హాయిగ బుట్టెన్!!*

అలా చిలుకగా చిలుకగా చివరకు *కరోనా 🦑🐙 అనే మహమ్మారి హాలాహలమై* పుట్టి జడలు విదిల్చి  నాల్కలు జాపి వారూ వీరని, తప పర, ధనిక👨‍✈️ పేద, రాజు రైతు 💂‍♂️ అనే తేడాలేక అందరిని చప్పరించ సాగింది. 

దాని దెబ్బకు జగతి విలవిల లాడింది. చక్రాలాగిపోయాయి. ఫాక్టరీలాగి పోయాలి, 🚂🛤️🛣️రైళ్ళూ🚝🚉🚊 బస్సులూ,🚎🚌, కార్లూ, 🚙🚕🚗 విమానాలు✈️🛫🛩️ పరుగులాపు ఎక్కడి వక్కడ నిల్చిపోయాయి. 

వీధి చివర చిన్న చిన్న  దుకాణాల దగ్గర్నుంచి పెద్ద షాపులు, మాల్సు, 🏣🏬🏥🏢 సినిమా హాళ్ళూ , పెట్రోలు బంకులు,⛽  పార్కులు క్లబ్బులూ పబ్బులూ టపటపా మూతబడ్డాయి. 

నరేంద్రుడు నివ్వెరబోయి స్వీయ  గృహనిర్భంధం ప్రకటించాడు.  అయినా కొందరాతతాయిలు తప్పించు కున్నారు. 🏃🏼‍♀️🏃🏼‍♂️  కోరి కోరి కరోనా నంటించు కుంటున్నారు. 

కం

రంజన చెడి మానవులే

కుంజరయూధమున దోమ కుత్తుక భంగిన్

పంజరమున బందీలుగ

గింజుక చచ్చిరి కరోన గిల్లుట వలనన్!!

దేశదేశాల్లో ఆ మహమ్మారి ధాటికి జనులు పిట్టల్లా రాలిపోతున్నారు. ప్రజలు కనుభవమైన సునామీలు🔥💫 తూఫాన్లు, భూకంపాలూ, ప్లేగులు దీని ధాటికి దిగతుడుపే.  రోజురోజుకి దాని తీవ్రత ఎక్కువైనది.💥

అలాటి విపత్కర సమయంలో *అచ్యుతానంత గోవిందా* యని కొందరూ, *రుద్ర సూక్తాలను* కొందరూ, *మన్యుసూక్తాలను* మరికొందరూ, *క్రిమిసంహారక* సూక్తాలను కొందరూ, ఇలా ఎవరికి తోచిన పరిహారాలను వారి పఠిస్తూ స్మరిస్తూ, వెల్లుల్లి, లవంగాలు, తులసి, తిప్పతీగలను, సొంఠి, మురియాలు లాటి రకరకాల గృహౌషధాలను, కషాయాలను టన్నులు టన్నుల క్రొద్దీ మింగుతూ 😄😄 ఉండగా, ఆఁ ఈ కరోనా మనల్నేం చేస్తుంది మన *మందు మనకుందిగా*🍺🍻🍯🥂🍷🥃   అని కొందరు ఘనులు సీసాలు సీసాలు, పీపాలు పీపాలు లాగిస్తున్నారు. 

నాబోటి వారు ఎందుకైనా మంచిదని కందయాగం చేస్తున్నారు. ఆ భగవంతుడిని ప్రార్థిస్తున్నారు.

కం.

*హాలాహలమే మ్రింగితి*

*కాలుని దన్నితి పరేశ గరుణా సింధో!*

*ఏలా యుపేక్ష శివ శివ*

*లీలగ రావయ కరోన రిక్తము జేయన్!*

*_మరి ఆదేవుళ్ళేమి చేస్తున్నారో....?_*

మొత్తం మానవజాతి యావత్తూ ఇలా పిట్టల్లా రాలిపోతుంటే!! గుడులు గోపురాలన్నీ మూసేశారు. 

కం.

*ఎక్కడి దేవుళ్ళక్కడె*

*చక్కగ సేవల సుఖముల చాలని యనరే!*

*దక్కెను కరోన మాకిల*

*చక్కెర పొంగలి తినెదరు చక్కగ వారున్!!*

ఈ కరోనా బారిన పడకుండా

కొందరు మాస్కులు తగిలించుకుంటున్నారు 😷😷

 దండకాలు వ్రాస్తున్నారు

 🙏దండాలు పెడుతున్నారు. 🙇🏼‍♀️🙇‍♂️, దస్కీలు తీస్తున్నారు💪💪, యోగా చేస్తున్నారు

🧎🏻🧎‍♀️.

ఎవరికి తోచిన రీతిన వారు కరోనా మహమ్మారిని ఎదుర్కినడానికి సన్నధ్ధమౌతున్నారు.

కం.

ఎవ్వరు జేసిన కర్మము

నవ్వారిని విడువదనుచు నందరు తలపన్!

అవ్వల నివ్వల జచ్చిరి

కవ్వము లాగా చిలికెను కాళి కరోనా!!

అలా దేవదానవుల రూపులైన మనుజులు చిలుకగా చిలుకగా పుట్టిన కరోనా 🐲🐲  యనే హాలాహలాన్ని  అవలీలగా కట్టడి చేయగ దానిని గృహనిర్భంధం చేసి మోడీ (ళీ)చేసి తన గొంతులో నిలుపుకున్నాడా నరేంద్రుడు.

కం.

పట్టిన పట్టుని విడువడు

గట్టిగ చెప్పెను జనులకు కదల వలదనెన్!

రట్టడి నాపెను చివరకు

కట్టడి చేయగ కరోన ఖైదై పోయెన్! 

పూర్తిగా ఈ కరోనా మాయమవలేదు. తాత్కాలిక కట్టడి మాత్రమే జరిగిందట. 

మరి అలనాడు పాలకడలి చిలికితే హాలాహలమే కాక ఉచ్చైశ్రవము , అప్సరసలు, ఐరావతము, కల్పవృక్షము, కామధేనువు,  లక్ష్మీదేవి ఇలా చాలా పుట్టుకొచ్చాయి. 

మరిప్పుడేం జరిగింది?? ఇలా కరోనా కట్టడి వల్ల ప్రజలకు కిన్ని మేళ్ళు కూడా కలిగాయట. 

కం.

కలిసుండిన కలదు సుఖము

బలుసాకైనా బ్రతుకుకు బాగు కరోనా!

మెలమెల్లగ బుధ్ధి గలిగె

మెలకువ కలిగించె నిట్లు మేటి కరోనా!!

కలిసిమెలసి ఉంటే సుఖమని కొందరు కనుగొన్నారు. ☺️☺️

కం.

తెలతెల వారగ పక్షుల

కిలకిల రావముల వల్ల కీడే తొలగెన్!

విలవిల లాడిరి కొందరె

గలగల మాట్లాడిరంత గనవెకరోనా!!

కొందరుదయాన్నే నిద్రలేచి పక్షుల 🦜🦚🕊️ కిలకిలలు విన్నారట దానివల్ల కొంత కీడు తగ్గిందట. కొంతమంది గృహ నిర్భంధం వల్ల ఇబ్బంది పడినా  పాత మిత్రులతోటి, బంధువులతోటి ఫోన్లో గలగలా మాట్లాడారట చాలామంది. 

అంతేనా అప్పుడు 🦄🦄ఉచ్చైశ్రవము పుడితే ఇప్పుడు కొందరు తమ తమ వాహనాలమ్మేసి  🐴 గుర్రాలు ఎడ్లబండ్లు కొనుక్కున్నారట.

 కొందరేమో ఆరోగ్యానికి,😜 

  మేలని 🚶🏻‍♂️🚶🏼‍♀️ నడక, పరుగు, 🏃🏼‍♂️🏃🏼‍♀️‍ జాగింగ్ లాటివి ప్రారంభించారట. 

కం.

వాహనముల రొద తగ్గెన్

సాహసములు జేసి కాలు సాగించె నరుల్!

ఆహా మేలని గుర్రపు

వాహనములనెక్కినారు వారుకరోనా!!

మరి అప్పుడు అప్సరసలు పుట్టారుగా మరిప్పుడు??

కం.

మిలమిల మెరిసెడి కన్నులు

తళతళ లాడెడి కురులును తమకము నింపన్!

కలలా గడచెను కాలం

బిలలో తనసతియె చాల యింపు కరోనా!

ఇన్నాళ్ళు ఎక్కడ దాచావోయ్ ఇంతటి 💋👄💁‍♀️ అందమని తమ తమ ఇంతుల అందాలని కనుగొన్నారట చాలామంది పురుషపుంగవులు. 😇🤪.

అంతేనా...😁😁😁

పనిగట్టుకు పగబట్టెను

కనిపించదు యీ కరోన కష్టమ్ బెట్టెన్

వనితల కష్టము పెరిగెను

తిని పెంచిన *వారి* బొర్ర తిప్పలు పెరిగెన్!!

ఇంటిపట్టున ఉండి రుచులు రుచులుగా వండివారిస్తే బొర్రలు పెరిగాయి మొర్రో అనికొందరు, సరుకులు కరిగి పోతున్నాయని బాబోయని కొందరు భార్యలు ఏడ్చారు. 

కం.

పగలంతయు పని చేసెను

వగలన్నియు రాత్రి వేళ వన్నెలు జూపెన్!

మిగిలెను కరోన కర్చని

నగలను చేయించ మంచు నాసతి దెలిపెన్!!

బైట తిరుగుళ్ళు ఖర్చులు చాలా మిగిలు...మీర నాకు నగలు చేయిస్తే మీకు మేలు అని కొందరు పతివ్రతలు వగలొలకపోస్తూ  వార్నింగ్ ఇచ్చినట్లు తెలిసింది. 

😜🤪

ఇలా ఎవరింట్లో వారుంటే..

కం.

ఎవరింటిన వారుండగ

ఎవరంట్లనువారె త్రోమ నేమి కరోనా!

చివరకు సడలెను కర్ఫ్యూ

నవసర మయినంత నేర్పె నయ్యొ కరోనా!!

ఇలా చాలా చాలా (సుఖమైన సంసారానికి సులభ సూత్రాలను) అవసరమైనప్పుడు విషయాలు నేర్చుకున్నారు కొందరు. 😂😂

సరేనండీ... మరి అప్పుడు లక్ష్మీదేవి పుట్టింది కదా మరిప్పటి సంగతేమిటీ అన్నారు కొందరు.??

కం.

పెద్దమ్మ బుట్టె చివరకు

పెద్దన్న వణక గడగడ పెరిగెకరోనా!

సుద్దులను విన్న వారల

వద్దకు వెళ్ళదట మేలు వగచెకరోనా!!

ఇప్పుడు లక్ష్మీదేవి అక్కగారు ముందుపుట్టారట. దాని ధాటికి అమెరికా పెద్దన్న కూడా విలవిల లాడాడట. 🥶😭😤🤯. మంచి మాటలు (సుద్దులు)వినే వారిని విడచి మిగతావారిని చప్పరించడం మిదలెట్టిందా భూతం. 🤣🤣😂😂

కం.

ఆర్థిక మాంద్యము బుట్ట స

మర్ధించెడు వారులేక మరిగె కరోనా!

వ్యర్థములై బ్రతుకు మన

స్పర్థలు పెరిగెను చివరకు శాంతియె తొలగెన్!

చివరకు ఆర్థిక మాంద్యము పట్టింది జగతికి. 😞😞☹️🙁😕😟.

మరి లక్ష్మీదేవి సంగతేం జేశారు అని అడిగారుగా... ఆవిడా పుట్టింది.

కం.

దానము ధర్మము చేయుచు

మానవులనిపించు కొన్న మాసెకరోనా!

మానవ సేవయె మేలని

మానక చేసిన మనుజుల మధ్యన నిలచెన్!

ఆవిడ అలా జన్మించి మంచి మానవుల గుండెల్లో పెరిగింది. మానవసేవయే మాధవసేవ అని నిస్వార్థంగా సేవ చేసే వారి హృదయాల్లో శాశ్వత నివాసం ఏర్పరచుకున్నది. అలా లక్ష్మీదేవి తన మాధవుడిని చేపట్టింది. ☺️☺️🤘.

మరి ముందు ముందు ఏం జరగబోతున్నది?? అదేనండీ కరోనా లాక్డౌన్ తొలగించిన తరవాత ఏం జరుగుతుంది.??

పెళ్ళిళ్ళకు ఫంక్షన్లకు, వెళ్ళాలా లేదా??

కం

పెళ్ళిళ్ళకు పోవలెనే

కళ్ళెము వేసెను కరోన కష్టము వచ్చెన్

వెళ్ళాలో లేదోమరి

పెళ్ళాలే చెప్పగలరు ప్రేమము మీరన్!

కం.

పేరంటాలకు బోవన్

క్వారంటైనా కరోన కాలము గనుకన్!

మీరెంతైనా చెప్పుడు

వారింతైనా వినరు నివారింప వలెన్!!

కం.

సినిమా హాళ్ళకు పోనిక

కనిపించిన చోట్లకెల్ల కాళ్ళరిగేలా

పనిలేకుండగ తిరుగను

మనిషిగ మిగిలెద కరోన మాయను గెల్తున్!!

ఈ విధంగా ధనార్జన పరమావధి కాదని జనార్ధనుని తలచడమే మేలని కొందరు తెలుసుకున్నారు.  చాలా మంది నేర్చుకున్నట్లు లేదు. 

🙏🙏

భవదీయుడు,

శ్రీ లంక శివరామకృష్ణ శాస్త్రి.

9701367992.

LSRK SASTRY