మాఘ పురాణము

 

మాఘ పురాణము పదిహేడవ అధ్యాయము.

మాఘ పురాణము (పదిహేడవ అధ్యాయము)

ధర్మమార్గము జూపవచ్చిన దత్తదేవుని దల్చెదన్

కర్మలన్నియు ప్రోదిజేసెడి కార్యకారణ రూపుడౌ

నిర్మలాత్ముడు దత్తదేవుని నీడయందున నిల్చెదన్.

మర్మమించుక దెల్పమందును మాఘ మాసము శ్రేష్ఠతన్.

శుకమహాముని మార్కండేయుడు మృత్యువును జయించెనని జెప్పగా పరీక్షిత్తు "ఓ మహాత్మా" ఆ వివరమును దెల్పని ప్రార్థించెను.‌

తరళము.

వినుము పాండవ పౌత్రుడాయని వేద్యుడౌ శుక మౌని‌తా

ననునయంబుగ జెప్పెనా కథ, నారుమాసము లాయు వే

తనకు దక్కెనటంచు బల్కు విధాత దిక్కని చెప్ప నా

ముని మృకండు మరుద్వతుల్ విని మూర్చ నొందిరి యక్కటా.

తరళము.

తనయుడా నిను చూడకుండిన దక్కునా మరి ప్రాణముల్

మనిసిజానుని వైరి గొల్వగ మాకు దక్కిన పుత్రుడా

తనయుడుండని యింటివారికి దక్కునా సుఖ సౌఖ్యముల్

తనయుడే గద వెల్గునిచ్చును తల్లుదండ్రుల కళ్ళకున్.

మ.కో

ఎన్ని నోములు నెన్ని పూవుల నెన్ని పూజలు సల్పుచున్

యెన్ని దీక్షలు బట్టినామయ నెన్నినాళుల నిష్ఠతో

నిన్ను పొందిన భాగ్యమేమరి నీలకంఠుని మ్రొక్కగన్

కన్న తండ్రివి నిన్ను గంటిమి కాలకంఠుడు మెచ్చగన్.

తరళము.

సుతులు లేని గృహంబులున్ మరి సూర్యు డుండని బవ్వలుల్

శతమయూఖుడు లేక శూన్య ఖజాక మందురు చూడగన్

సుతులు లేకయె లోక ధర్మము శూన్యమై గతి తప్పునే

సుతులు గల్గిన వారికే పలు సూనృతంబులు దక్కనే.

తరళము

మునుపు బ్రాహ్మణ సొత్తు దోచగ మోసగించి న వాడనా

పెనగి బిడ్డను తల్లుదండ్రుల  వేరు చేసిన పాపినా

మునుకు యాకొని యున్న వానిని పొమ్ముపొమ్మను  దోషినా

యని మృకండుడు చింతనొందెను నబ్బురంబుగ దోచెనే.

గీ.

దేవతలనింద యతి నింద తెలివి దప్పి 

ప్రాణ నిందను జేసిన పాపి నగుదు,

సాధుజనులను తెలియక బాధపెట్ట

పూర్వజన్మల పాపము ముందు నిలచె

ననుచు నామృకండు మహర్షి యలమటించె.

మ.కో.

పిల్లవాండ్లను తల్లుపాలకు వేరుచేసిన పాపినో

పిల్లతల్లుల జూసి యీసును పెంచుకున్న విమోహినో

ప్రల్లదంబున ప్రక్కటిండ్లకు బాఱితో యని నేడ్చెనా

తల్లిచెంత మృకండు సూనుడు ధైర్యమించుక జెప్పెగా.

వచనము

కుమారా నీకు మరో ఆరుమాసములే ఆయువని చింతించు తల్లిదండ్రులను జూచి ఆ మార్కండేయుడు ఇట్లనె. 

తరళము.

సవినయంబుగ బల్కెనిట్టుల శాంతచిత్తము నందునా

శివుని మెప్పును బొందినారలు చింత నొందుట న్యాయమా

భవుని గొల్చెద నాయువిమ్మని భార మంతయు వేసెదన్

యెవని కైనను నాయువిచ్చెడి ఈశుడుండెను దిక్కుగా.

మ.కో

ఆరుమాసము లందుదీరెడి నాయువున్నది చాలదా

కారుచీకటి పార ద్రోలెడి కాలకంఠుడు దిక్కు నే

చేరి మ్రొక్కెదనీశునే మరి శ్రీ కరంబగు  దీప్తికై

మీరు చింతలబోకుడంచును మించి బల్కెను పుత్రుడే.

వచనము.

అనవుడు మృకండుడు తన కుమారుని జూచి ఇట్లనె. "పూర్వము సిధ్ధజనార్థన క్షేత్రమని నేడు కోటిఫలి (కోటిపల్లి) యను క్షేత్రము" గౌతమీ తటిన గలదు. అచటకేగి మృత్యుంజయునివి కమ్మని దీవించి బంపిరి.

మ.కో

గౌతమీతటి నందు గొప్పది కాలకంఠుని క్షేత్రమే

భూతనాథుని చేరి గొల్చిరి మున్ను మౌనులు తాపసుల్

శ్వేతకేతుని రక్షజేసెను జింకతాలుపు మున్నిటన్

చేతనత్వపు కోటిపల్లికి చేరుకొమ్మిక పుత్రుడా

మానిని.

సిధ్ధజనార్థన క్షేత్రము కేగుము సిధ్ధులు మున్ను వసించిరటన్

బుధ్ధిగ జేసిన పూజఫలించగ పూర్వము చెప్పిరి భూసురులున్

ఒద్దికగావిని ఓయని బల్కుచు నూరిని వీడెను నోరిమితో

సద్దును జేయక సాగెసతర్కుడు సాధ్య ఋషీవర సాధనకై.

ఆ పుణ్యగౌతమీ తీరానికి చేరిన  మార్కండేయుడు.

మానిని

తానొక లింగము స్థాపన జేసెను ద్రాపుని గొల్వగ  తాపసియై

పూనికనొందెను పూలను పత్రిని పూజకు గూర్చెను భూసురుడే

మానసపూజ నుమాపతి గొల్చెను మాపని రేపని మానకనే

దీనజనావన దేవరకావర దిక్కువు నీవని దీనముగా.

మానిని.

నామము బల్కెద నామది నీదిగ నాయువు నీయవె నాకు శివా,

నీమము దప్పక నీపద మంటెద  నీదయ కోరుదు నింకశివా,

కాముని గాల్చిన కాలుడవైతివి  కామన సేసెద కావుమయా,

నామది వీడకు నాదవిలోలుడ నాట్యవిశారద నాగశివా!

వచనము.

ఇక ఆ మార్కండేయునికి పదహారేండ్ల వయసు పూర్తి కావచ్చింది.

అంత విధాత దేవతాదులతో కూడి పరమేశ్వరుని చేరి తాను అనాలోచితముగా మార్కండేయుని చిరంజీవ అని దీవించిన వైనాన్ని భక్తితో తెల్పి, ఆ మృకండు సూనుని  కరుణించి చిరంజీవిని చెయ్యమని ప్రార్థించారు. 

మ.కో.

అంతనా విధి దేవతాదులు నంతకాంతకు గొల్వగా

చెంత నిల్చిరి చేరి మ్రొక్కిరి చెప్పిరాకథ నంతయున్

సంతసించి మృకండు సూనుకు చాలనాయువు నిచ్చెతా.

చింత దీర్చెద పోయిరండని జింకతాలుపు చెప్పెగా.

వచనము.

మాఘశుధ్ధ పంచమినాటికి మార్కండేయునికి పదారేండ్లు నిండినవని వాని తెమ్మని యమధర్మరాజు భటులబంపెను.

మానిని

కాలము తీరగ కాలుని భ్రుత్యులు గాలము వేయగ గాంచితిరా

బాలుని జేరగ బాలుడు జూచెను బాఱెను మందిర ప్రాంగణమున్

కాలుని భ్రుత్యులఁ కాదని చెప్పిరి  గౌపతి భ్రుత్యులు గాచిరిగా,

కాలుని భ్రుత్యులు కాదని చెప్పగ కాలుడు జూపెను కావరమున్.

వచనము.

ఈ బాలుని బట్టుట మా వల్లకాదని భ్రుత్యులు చెప్పగా మాఘశుధ్ధ సప్తమి (రథసప్తమి) నాటికి కాలుడే స్వయంగా వచ్చెను క్రుధ్ధుడై.

మ.కో

కాలుడొచ్చి మృకండు సూనుని కాలమా యెను రమ్మనెన్

పూలు దెచ్చి పురారి గొల్చుచు పూజసేయుచు నుండెనా

బాలుడత్తరి కౌగిలించెను పంచవక్త్రుని నార్తితో

తాళుమోప్రభు పూజచేసెద తాళివచ్చెద నన్ననూ.

కాలుడాగక పాశబధ్ధుని కావరమ్ముగ జేసెగా

శూలపాణియె క్రుధ్ధుడాయెను సూటి తాపును తన్నగా

కాలుడత్తరి మూర్చనొందెను కాలమాగెను వానికిన్

కేలుమోడ్చిరి చేరి మ్రొక్కిరి గిబ్బ రౌతుదయా మయున్.

ఫెళ్ళెఫెళ్ళెను దిక్కులన్నియు  పెద్ద శబ్దము నిండెగా

సుళ్ళుదిర్గెడి వింతవెల్గులు శూలపాణిని జుట్టెగా

కళ్ళు దిర్గిన కాలుడప్పుడు కాంకమందిన వానిగా

త్రుళ్ళిపోయెను కాలుడత్తరి దొర్లిపోయెను భీతితో.

శ్రీలుగూర్చును మాఘమాసము శ్రీకరమ్ములు నిచ్చుతన్

పాలు బిల్వము గంగనీటని పార్వతీశుని కిచ్చుచున్

నీలకంఠుని లోకచక్షుని నిష్ఠతో నుతి జేయగన్

మేలుమేలని పెద్దలందరు మించి చెప్పిరి మున్నిటన్.

బాలుడీతడు నన్నుగొల్చెను భక్తిమీరగ కాలుడా

కాలపాశము నాకు వానికి కావరమ్మున వేసితో

చాలు చాలును తెంపరీ నిను చావదన్నిన మేలగున్

కాలకంఠుని నేనుదల్చిన కాలమెట్టుల తీరురా?

వచనము.

అలా ఆ కాలకాలుడు కాలునికి బుధ్ధిచెప్పి బాలుడైన మార్కండేయుని రక్షించి చిరాయువునిచ్చినది ఈ మాఘమాసము నందేనని ఆ శుకబ్రహ్మ పరీక్షిత్తుకు వివరించెను.

స్వస్తి.

ధన్యవాదములు.

నమస్కారములు.

నాకు ఈ అవకాశము మరోసారి కల్గించినందుకు మీకు సదా కృతజ్ఞతలు తెల్పుతూ,

భవదీయుడు.

లంక శివరామకృష్ణ శాస్త్రి,

కుషాయిగుడ-500062

హైదరాబాదు.

10/02/2021

కరోనాయను హాలాహలోపాఖ్యానము

కరోనాయను హాలాహలోపాఖ్యానము

పూర్వం దేవదానవులు మరణాన్ని జయించడానికి  అమృతపానము మేలని దాని కోసరం క్షీరసాగర మధనం చేశారు. ఆకథ మీకు తెలుసినదే. దానిని స్పూర్తిగా తీసుకొని వ్రాసిన వృత్తాంతము. ఎవ్వరిని నొప్పించాలని కానీ ఎవ్వరిని కించపరచాలని కానీ నాకు లేదు. సరదాగా తీసుకోవాలని విన్నపముతో. 🙏🙏

@@@@@@@@@@@

ఈ కలియుగం లో మానవులు

ఈ భూమి 🌎🌍🌏 మీద చిరకాలం నివసించాలని మరణాన్ని కష్టాలను  జయించాలని పరిపరి విధాల ఆలోచించి ఆలోచించి🤔 తపించి  ఈ మరణాన్ని జయించాలన్నా తమకు కలిగే రకరకాల కష్టాలు తొలగాలన్నా సుఖంగా ఉండాలన్నా తమకు ₹₹₹₹ *ధనసంపాదనమే* దిక్కని, *ధనమూలం మిదం జగత్తని* 

యోచించి బీదా బిక్కీ అనే తేడాలేక ధనిక 🇧🇸 పేద దేశాలనే తేడాలేక 🇦🇽🏴‍☠️ ప్రపంచమంతా ఏకతాటిపై నిలచి *కష్టాలనే* సముద్రాన్ని చిలకడానికి తయారయ్యారు. దానికి *స్వార్థమనే*🌋⛰️🏔️ పర్వతాన్ని ఎంచుకొని *మోసమ* నే సర్పాన్ని🐍🐍 చుట్టి చిలకడం ప్రారంభించారు. కలిపురుషుడు కూడా ఈ *భారాన్ని* తన వీపు   మోయడానికి ముందుకొచ్చాడు. 

ఈ మహత్కార్యంలో దేవతలెవరో 😇 దానవులెవరో👺👺 అనే సందేహము వలదు. ఇదే

ధర్మ మార్గంమని చాటుకుని పూజలు, జపాలు, వ్రతాలు, ప్రార్థనలు నోములూ, హోమాలూ వగైరా వగైరా  చేసి (దేవతలు) ధనార్జన చేసే వారొకప్రక్కా, మోసాలూ, ద్వేషాలు, కల్తీలూ, మారణహోమాలు చేసే (దానవులు) మరో ప్రక్కా ఉన్నారు.

అలా చిలకగా చిలకగా మొదట్లో *ఉద్యోగా* లొచ్చాయి, *వ్యాపారా* లొచ్చాయి, రకరకాల *మోసాలొచ్చాయి*  కొందరవీ కొందరివీ పంచుకున్నారు.

 *ఇదంతా విస్మయంగా చూస్తున్నాడు సర్వాంతర్యామి అయిన ఆ శ్రీ హరి.*😕😕😕☹️

ఇంకా చిలకగా ధనసంపాదనకు రకరకాల దారులు గోచరమయ్యాయి మానవులకు.

*పాలల్లో నీళ్ళు కలపొచ్చని*

*బియ్యంలో రాళ్ళు కలపొచ్చని*  

*కల్తీ/ నాసిరకం సరుకులు, మందులు*తయారు చేయొచ్చని,*

 *షేరుమార్కెట్లు పెట్టి జనాల ఆస్తులు క్షణాల్లో కొల్లగొట్టచ్చనీ*

*ఖర్చు తగ్గించుకొని* *ఆదాయాన్ని పెంచడానికి* మామూలుగా దొరికే కోళ్ళు🐓🐓, 🐰🐰కుందేళ్ళూ 🐟🐠 చేపలే 🦙🐑 మేకలూ గొర్రెలే  కాక

🐸🐸 కప్పల్ని,🐛 వాన పాముల్ని, 🐍 పాముల్ని, గబ్బిలాయిలని,🦇🦇 తేళ్ళని🦂🦂, ఎలకలని 🐀🐁, బొద్దింకలని, రకరకాల క్రిమికీటకాలను🐝🐞 తినొచ్చని కొందరు తేల్చారు.

కం.

*గబ్బిలము కప్ప తేళుల*

*సుబ్బరముగ తిన్నవాని చోద్యము గనరే!*

*యబ్బుర మాయెను జగతికి*

*యబ్బాబ్బా యీకరోన నంటించనయా*

ఏవేవో ఇలాటివే రకరకాల దారులు ధరార్జనకై తెరుచుకున్నాయి. 

ఇదే అదనుగా *కలి పురుషుడు* విజృంభించి తనూ తన ప్రభావాన్ని ప్రతాపాన్ని చూపించి ప్రజలకు ఆదాయమార్గాలు చూపించాడు.

కం.

*అప్పుడమిపైన నప్పటి*

*కప్పుడు గిరి కష్టములను క్రమ్మగ ద్రిప్పన్!*

*చప్పుడునిండె నజాండము*

*చెప్పెడిదే మజుని చెవులు చిందర గొనియెన్!*

ఇలా కష్టాలనే పర్వతాన్ని చిలుకుతుంటే ఆ బ్రహ్మగారికి ఆశ్చర్యం కలిగి చెవులు చిల్లులు పడ్డాయట....🥵

ఆ చిలకడమనే మహత్కార్యంలో  కష్టములనే గిరిని తన వీపుపై మోసిన కలిపురుషుని తీటకూడా తీరలేదట!!

కం.

*ఈలీల కష్టముల నవ*

*లీలగ జిలుకె సురలసుర లేర్పడ గనుమా!*

*కోలా హలమై చివరకు*

*హాలా హలమను కరోన హాయిగ బుట్టెన్!!*

అలా చిలుకగా చిలుకగా చివరకు *కరోనా 🦑🐙 అనే మహమ్మారి హాలాహలమై* పుట్టి జడలు విదిల్చి  నాల్కలు జాపి వారూ వీరని, తప పర, ధనిక👨‍✈️ పేద, రాజు రైతు 💂‍♂️ అనే తేడాలేక అందరిని చప్పరించ సాగింది. 

దాని దెబ్బకు జగతి విలవిల లాడింది. చక్రాలాగిపోయాయి. ఫాక్టరీలాగి పోయాలి, 🚂🛤️🛣️రైళ్ళూ🚝🚉🚊 బస్సులూ,🚎🚌, కార్లూ, 🚙🚕🚗 విమానాలు✈️🛫🛩️ పరుగులాపు ఎక్కడి వక్కడ నిల్చిపోయాయి. 

వీధి చివర చిన్న చిన్న  దుకాణాల దగ్గర్నుంచి పెద్ద షాపులు, మాల్సు, 🏣🏬🏥🏢 సినిమా హాళ్ళూ , పెట్రోలు బంకులు,⛽  పార్కులు క్లబ్బులూ పబ్బులూ టపటపా మూతబడ్డాయి. 

నరేంద్రుడు నివ్వెరబోయి స్వీయ  గృహనిర్భంధం ప్రకటించాడు.  అయినా కొందరాతతాయిలు తప్పించు కున్నారు. 🏃🏼‍♀️🏃🏼‍♂️  కోరి కోరి కరోనా నంటించు కుంటున్నారు. 

కం

రంజన చెడి మానవులే

కుంజరయూధమున దోమ కుత్తుక భంగిన్

పంజరమున బందీలుగ

గింజుక చచ్చిరి కరోన గిల్లుట వలనన్!!

దేశదేశాల్లో ఆ మహమ్మారి ధాటికి జనులు పిట్టల్లా రాలిపోతున్నారు. ప్రజలు కనుభవమైన సునామీలు🔥💫 తూఫాన్లు, భూకంపాలూ, ప్లేగులు దీని ధాటికి దిగతుడుపే.  రోజురోజుకి దాని తీవ్రత ఎక్కువైనది.💥

అలాటి విపత్కర సమయంలో *అచ్యుతానంత గోవిందా* యని కొందరూ, *రుద్ర సూక్తాలను* కొందరూ, *మన్యుసూక్తాలను* మరికొందరూ, *క్రిమిసంహారక* సూక్తాలను కొందరూ, ఇలా ఎవరికి తోచిన పరిహారాలను వారి పఠిస్తూ స్మరిస్తూ, వెల్లుల్లి, లవంగాలు, తులసి, తిప్పతీగలను, సొంఠి, మురియాలు లాటి రకరకాల గృహౌషధాలను, కషాయాలను టన్నులు టన్నుల క్రొద్దీ మింగుతూ 😄😄 ఉండగా, ఆఁ ఈ కరోనా మనల్నేం చేస్తుంది మన *మందు మనకుందిగా*🍺🍻🍯🥂🍷🥃   అని కొందరు ఘనులు సీసాలు సీసాలు, పీపాలు పీపాలు లాగిస్తున్నారు. 

నాబోటి వారు ఎందుకైనా మంచిదని కందయాగం చేస్తున్నారు. ఆ భగవంతుడిని ప్రార్థిస్తున్నారు.

కం.

*హాలాహలమే మ్రింగితి*

*కాలుని దన్నితి పరేశ గరుణా సింధో!*

*ఏలా యుపేక్ష శివ శివ*

*లీలగ రావయ కరోన రిక్తము జేయన్!*

*_మరి ఆదేవుళ్ళేమి చేస్తున్నారో....?_*

మొత్తం మానవజాతి యావత్తూ ఇలా పిట్టల్లా రాలిపోతుంటే!! గుడులు గోపురాలన్నీ మూసేశారు. 

కం.

*ఎక్కడి దేవుళ్ళక్కడె*

*చక్కగ సేవల సుఖముల చాలని యనరే!*

*దక్కెను కరోన మాకిల*

*చక్కెర పొంగలి తినెదరు చక్కగ వారున్!!*

ఈ కరోనా బారిన పడకుండా

కొందరు మాస్కులు తగిలించుకుంటున్నారు 😷😷

 దండకాలు వ్రాస్తున్నారు

 🙏దండాలు పెడుతున్నారు. 🙇🏼‍♀️🙇‍♂️, దస్కీలు తీస్తున్నారు💪💪, యోగా చేస్తున్నారు

🧎🏻🧎‍♀️.

ఎవరికి తోచిన రీతిన వారు కరోనా మహమ్మారిని ఎదుర్కినడానికి సన్నధ్ధమౌతున్నారు.

కం.

ఎవ్వరు జేసిన కర్మము

నవ్వారిని విడువదనుచు నందరు తలపన్!

అవ్వల నివ్వల జచ్చిరి

కవ్వము లాగా చిలికెను కాళి కరోనా!!

అలా దేవదానవుల రూపులైన మనుజులు చిలుకగా చిలుకగా పుట్టిన కరోనా 🐲🐲  యనే హాలాహలాన్ని  అవలీలగా కట్టడి చేయగ దానిని గృహనిర్భంధం చేసి మోడీ (ళీ)చేసి తన గొంతులో నిలుపుకున్నాడా నరేంద్రుడు.

కం.

పట్టిన పట్టుని విడువడు

గట్టిగ చెప్పెను జనులకు కదల వలదనెన్!

రట్టడి నాపెను చివరకు

కట్టడి చేయగ కరోన ఖైదై పోయెన్! 

పూర్తిగా ఈ కరోనా మాయమవలేదు. తాత్కాలిక కట్టడి మాత్రమే జరిగిందట. 

మరి అలనాడు పాలకడలి చిలికితే హాలాహలమే కాక ఉచ్చైశ్రవము , అప్సరసలు, ఐరావతము, కల్పవృక్షము, కామధేనువు,  లక్ష్మీదేవి ఇలా చాలా పుట్టుకొచ్చాయి. 

మరిప్పుడేం జరిగింది?? ఇలా కరోనా కట్టడి వల్ల ప్రజలకు కిన్ని మేళ్ళు కూడా కలిగాయట. 

కం.

కలిసుండిన కలదు సుఖము

బలుసాకైనా బ్రతుకుకు బాగు కరోనా!

మెలమెల్లగ బుధ్ధి గలిగె

మెలకువ కలిగించె నిట్లు మేటి కరోనా!!

కలిసిమెలసి ఉంటే సుఖమని కొందరు కనుగొన్నారు. ☺️☺️

కం.

తెలతెల వారగ పక్షుల

కిలకిల రావముల వల్ల కీడే తొలగెన్!

విలవిల లాడిరి కొందరె

గలగల మాట్లాడిరంత గనవెకరోనా!!

కొందరుదయాన్నే నిద్రలేచి పక్షుల 🦜🦚🕊️ కిలకిలలు విన్నారట దానివల్ల కొంత కీడు తగ్గిందట. కొంతమంది గృహ నిర్భంధం వల్ల ఇబ్బంది పడినా  పాత మిత్రులతోటి, బంధువులతోటి ఫోన్లో గలగలా మాట్లాడారట చాలామంది. 

అంతేనా అప్పుడు 🦄🦄ఉచ్చైశ్రవము పుడితే ఇప్పుడు కొందరు తమ తమ వాహనాలమ్మేసి  🐴 గుర్రాలు ఎడ్లబండ్లు కొనుక్కున్నారట.

 కొందరేమో ఆరోగ్యానికి,😜 

  మేలని 🚶🏻‍♂️🚶🏼‍♀️ నడక, పరుగు, 🏃🏼‍♂️🏃🏼‍♀️‍ జాగింగ్ లాటివి ప్రారంభించారట. 

కం.

వాహనముల రొద తగ్గెన్

సాహసములు జేసి కాలు సాగించె నరుల్!

ఆహా మేలని గుర్రపు

వాహనములనెక్కినారు వారుకరోనా!!

మరి అప్పుడు అప్సరసలు పుట్టారుగా మరిప్పుడు??

కం.

మిలమిల మెరిసెడి కన్నులు

తళతళ లాడెడి కురులును తమకము నింపన్!

కలలా గడచెను కాలం

బిలలో తనసతియె చాల యింపు కరోనా!

ఇన్నాళ్ళు ఎక్కడ దాచావోయ్ ఇంతటి 💋👄💁‍♀️ అందమని తమ తమ ఇంతుల అందాలని కనుగొన్నారట చాలామంది పురుషపుంగవులు. 😇🤪.

అంతేనా...😁😁😁

పనిగట్టుకు పగబట్టెను

కనిపించదు యీ కరోన కష్టమ్ బెట్టెన్

వనితల కష్టము పెరిగెను

తిని పెంచిన *వారి* బొర్ర తిప్పలు పెరిగెన్!!

ఇంటిపట్టున ఉండి రుచులు రుచులుగా వండివారిస్తే బొర్రలు పెరిగాయి మొర్రో అనికొందరు, సరుకులు కరిగి పోతున్నాయని బాబోయని కొందరు భార్యలు ఏడ్చారు. 

కం.

పగలంతయు పని చేసెను

వగలన్నియు రాత్రి వేళ వన్నెలు జూపెన్!

మిగిలెను కరోన కర్చని

నగలను చేయించ మంచు నాసతి దెలిపెన్!!

బైట తిరుగుళ్ళు ఖర్చులు చాలా మిగిలు...మీర నాకు నగలు చేయిస్తే మీకు మేలు అని కొందరు పతివ్రతలు వగలొలకపోస్తూ  వార్నింగ్ ఇచ్చినట్లు తెలిసింది. 

😜🤪

ఇలా ఎవరింట్లో వారుంటే..

కం.

ఎవరింటిన వారుండగ

ఎవరంట్లనువారె త్రోమ నేమి కరోనా!

చివరకు సడలెను కర్ఫ్యూ

నవసర మయినంత నేర్పె నయ్యొ కరోనా!!

ఇలా చాలా చాలా (సుఖమైన సంసారానికి సులభ సూత్రాలను) అవసరమైనప్పుడు విషయాలు నేర్చుకున్నారు కొందరు. 😂😂

సరేనండీ... మరి అప్పుడు లక్ష్మీదేవి పుట్టింది కదా మరిప్పటి సంగతేమిటీ అన్నారు కొందరు.??

కం.

పెద్దమ్మ బుట్టె చివరకు

పెద్దన్న వణక గడగడ పెరిగెకరోనా!

సుద్దులను విన్న వారల

వద్దకు వెళ్ళదట మేలు వగచెకరోనా!!

ఇప్పుడు లక్ష్మీదేవి అక్కగారు ముందుపుట్టారట. దాని ధాటికి అమెరికా పెద్దన్న కూడా విలవిల లాడాడట. 🥶😭😤🤯. మంచి మాటలు (సుద్దులు)వినే వారిని విడచి మిగతావారిని చప్పరించడం మిదలెట్టిందా భూతం. 🤣🤣😂😂

కం.

ఆర్థిక మాంద్యము బుట్ట స

మర్ధించెడు వారులేక మరిగె కరోనా!

వ్యర్థములై బ్రతుకు మన

స్పర్థలు పెరిగెను చివరకు శాంతియె తొలగెన్!

చివరకు ఆర్థిక మాంద్యము పట్టింది జగతికి. 😞😞☹️🙁😕😟.

మరి లక్ష్మీదేవి సంగతేం జేశారు అని అడిగారుగా... ఆవిడా పుట్టింది.

కం.

దానము ధర్మము చేయుచు

మానవులనిపించు కొన్న మాసెకరోనా!

మానవ సేవయె మేలని

మానక చేసిన మనుజుల మధ్యన నిలచెన్!

ఆవిడ అలా జన్మించి మంచి మానవుల గుండెల్లో పెరిగింది. మానవసేవయే మాధవసేవ అని నిస్వార్థంగా సేవ చేసే వారి హృదయాల్లో శాశ్వత నివాసం ఏర్పరచుకున్నది. అలా లక్ష్మీదేవి తన మాధవుడిని చేపట్టింది. ☺️☺️🤘.

మరి ముందు ముందు ఏం జరగబోతున్నది?? అదేనండీ కరోనా లాక్డౌన్ తొలగించిన తరవాత ఏం జరుగుతుంది.??

పెళ్ళిళ్ళకు ఫంక్షన్లకు, వెళ్ళాలా లేదా??

కం

పెళ్ళిళ్ళకు పోవలెనే

కళ్ళెము వేసెను కరోన కష్టము వచ్చెన్

వెళ్ళాలో లేదోమరి

పెళ్ళాలే చెప్పగలరు ప్రేమము మీరన్!

కం.

పేరంటాలకు బోవన్

క్వారంటైనా కరోన కాలము గనుకన్!

మీరెంతైనా చెప్పుడు

వారింతైనా వినరు నివారింప వలెన్!!

కం.

సినిమా హాళ్ళకు పోనిక

కనిపించిన చోట్లకెల్ల కాళ్ళరిగేలా

పనిలేకుండగ తిరుగను

మనిషిగ మిగిలెద కరోన మాయను గెల్తున్!!

ఈ విధంగా ధనార్జన పరమావధి కాదని జనార్ధనుని తలచడమే మేలని కొందరు తెలుసుకున్నారు.  చాలా మంది నేర్చుకున్నట్లు లేదు. 

🙏🙏

భవదీయుడు,

శ్రీ లంక శివరామకృష్ణ శాస్త్రి.

9701367992.

LSRK SASTRY

గురువాయురప్ప

  కార్తవీర్యాది రాజరాజ్యప్రదోనఘః

విశ్వశ్లాఘ్యో మితాచారో దత్తాత్రేయో మునీశ్వరః

పరాశక్తి పదాశ్లిష్టో యోగానంద సదోన్మదః

సమస్త వైరి తేజోహృత్ పరమా మృత సాగరః

అనసూయా గర్భరత్నం భోగమోక్ష సుఖప్రదః

ఏవర మడుగను స్వామీ

దేవతలేనిను గొలిచిరి దీనశరణ్యా

దీవెన లిమ్మని యడిగెద

కావర  గురవాయురప్ప కరుణా సింధో.1

అహమును గెలువని వాడను

యిహపరముల గెల్చుటెట్లు యెప్పటి కగునో

అహరహము నిన్ను దలచెడి

మహిమను గురువాయురప్ప మందుగ. నిమ్మా.2

రాజులు పేదలు వత్తురు

రోజూ నినుచూడ నీదు లోఁగిలి వరకున్

జాజులు మల్లెలు దెత్తురు

పూజకు గురువాయురప్ప మోహనరూపా.3

నడచుట మరచిరి జనులిల

వడిగా వాహనమునెక్కి వదరుచు సెలులో

సుడిగాలి పోలె తిరిగిరి

భడవలు గురువాయురప్ప భయమే లేదే.4

 

పుల్లలు వాడరు పళ్ళకు

చల్లని త్రాగుట మరచిరి, చద్దన్నమునూ

మెల్లగ మరచిరి పెట్టుట

తల్లులు, గురువాయురప్ప తప్పాకాదా.5

 

పేస్టును తిందురు ప్రొద్దున

బూస్టును త్రాగుదురు చిప్సు భోంచేదురయా

రెస్టును విడువరు, మరచిరి

కస్టమ్స్,  గురువాయురప్ప కాలపు మహిమే.6

 లంచము లెన్నో మెక్కితి

సంచిత కర్మముల మరచి సత్యంబిదియే

కంచికి చేరని కథలే

మంచివి గురువాయురప్ప మన్నించవయా.7

సాధుల సంతుల జూచితి

సాధు ప్రవర్తన మరచితి సత్యంబిదియే

క్రోధము కామము విడచెడి

సాధన గురువాయురప్ప చప్పున నిమ్మా.8

ఊరక యుండని మనసిది

నేరిచి ఉఉ యనదు స్వామి నిజమే కాదా

దారిని తప్పితి చేర్చుము

తీరము గురువాయురప్ప తెప్పవునీవై.9

చేసిన పాపము పుణ్యము

వాసిగ నరజన్మ గలిగె ప్రారబ్ధమునన్

చేసిన పూజలు కొరవని

దాసుని గురువాయురప్ప దండించకయా.10

ఆచారము మంట గలిపి

గోచారము నెంచినాను కూరిమి లేకన్

దాచిన దాగవు తప్పులు

నీచుని గురువాయురప్ప నిందించకయా.11

ధనదాహము తీరదు నిం

ధనమైనది కీర్తి కాంక్ష, తాలిమి కొరవై

మనసును తనువును కాల్చెను

కనుమో గురువాయురప్ప కరుణాసింధో.12

కనులా కనపడ వాయెను

వినబడవు చెవులు, పలుకులు పెడసర మాయెన్

తనువా విలవిల లాడెను

మనసున గురువాయురప్ప మనుగడ రావా.13

దేహము నటమట నొందెను

మోహము బాధించెనన్ను మోహనరూపా

దేహిని నేనా యను సం

దేహము గురువాయురప్ప తీర్చగరావా.14

కాఫీ త్రాగక రోజులు

సాఫీగా సాగవంట సత్యంబెరుగన్

లాఫింగ్ మ్యాటరు కాదిది

కాఫీ గురువాయురప్ప కాలపు మహిమే.15

టీ యన యేకాక్షరమే

చాయని త్రాగింతురంట చక్కెర తోడన్

మాయల టీ కాఫీలను

పోయక గురువాయురప్ప పొద్దే పోదే.16

పిల్లల చదువులు మారెను

సెల్లుల పాలాయె నండి చెప్పగనేలా

తల్లులు తండ్రులు గురువులు

చెల్లరు గురువాయురప్ప సెల్లే లేకన్.17

దేవుని వంటిది వైరసు

కోవిడు కనబడదు గాని కోరలు జూపున్

నోవలు కరోన వంటిది

దేవుడ గురువాయురప్ప తేబోకు సుమా.18

ఇంటనె చదివిరి బిడ్డలు

నింటనె యుద్యోగమంట నింతికి పతికిన్,

మంటలు రేపెడి బ్రతుకుల

తంటా గురువాయురప్ప తప్పించవయా.19

అత్తయు మామయు బరువట 

క్రొత్తగ మాటాడునేడు కోడళ్ళయ్యో

అత్తల మామల కన్నులు

చిత్తడి గురువాయురప్ప చేయించకయా.20

~~ ~~ ~~

వందల *మందుల* షాపులు 

మందలుగా మందుకొంద్రు మందుల బాబుల్

మందుని  మ్రింగెడి ప్రజ నే

మందును గురువాయురప్ప మన్నించ. వయా.21

వార్తలు చూచిన చదివిన

భర్తీ యాస్పత్రిలోన భద్రము సుమ్మీ

వార్తలనమ్మెడి వారలు

కర్తలు గురువాయురప్ప కాదా చెపుమా.22

నాడిని చూడరు వైద్యులు

వేడిగ వడ్డింత్రు బిల్లు వేలకు వేలున్

గాడిన తప్పిన ల్యాబుల

దాడిని గురువాయురప్ప తప్పించవయా.23

అడుగడుగున గుడి కలదిట

యడుగడుగున బడికలదిట యడుగిడ  మీ  రా

బడినే పెంచును మరిమరి

తడబడి గురువారురప్ప తప్పనకయ్యా.24

అడుగడుగున  యాస్పత్రులు

వడివడిగా వచ్చెనండి వైరసులెన్నో

విడిగా వాక్సిను బిజినెసు

వడిగా గురువాయురప్ప ప్రాభవమొందెన్.25

పుచ్చిన కూరలు సరుకులు

మెచ్చిన వానికి పదవులు మిచ్చెన లెక్కన్

చచ్చిన వానికి వైద్యము

నిచ్చలు గురువాయురప్ప నిందించకయా.26

ఫ్రీగా పంచిరి సొమ్ములు  

ఫ్రీగా సారాయి గాని పెట్రోలనరే

ఫ్రీగా చేయరు వైద్యము 

ఫ్రీగా గురువాయురప్ప పిచ్చెక్కించున్.27

చీరకు మ్యాచింగ్ జాకెట్

చీరకు మ్యాచింగుమాస్కు జేబుకు చిల్లే

ఛీరన కర్చులు పెరుగును

చీరే గురువాయురప్ప చెర్రెత్తించున్.28

Cheer… ఛీర్ + అన-  ఛీరన

చక్కగ సుద్దులు విందురు

ముక్కలు లేకున్నవారి ముద్దే దిగదే

లెక్కగ మందును గొందురు

నిక్కము గురువాయురప్ప నిందించకయా.29

చక్కని గుడి గోపురములు 

ప్రక్కన బ్రాందీలనమ్ము బారుల్ బీరుల్

బొక్కిన దెంతో తెలిపెడి

లెక్కలు గురువాయురప్ప లేనే లేవే.30

పెళ్ళికి వయసే వచ్చిన 

పెళ్ళాడెడి వారులేరు  ప్రేమము పెరిగెన్

గుళ్ళో పూజారులకున్

పెళ్ళా గురువాయురప్ప పిల్లలు రారే.31

బాగా చదివిన డబ్బులు

బాగా రావచ్చునంచు బాల్యము మొదలున్

బాగా రుబ్బురి బిడ్డల

బాగే గురువాయురప్ప ప్రాణము తీసెన్.32

పిల్లలు నమేరికాలో

తల్లీతండ్రుల మరచిరి తప్పని యనరే

మళ్ళీ రారట గూటికి

యెల్లా గురువాయురప్ప యెగిరెను గువ్వల్.33

పిల్లల గని కామముతో

ప్రల్లదమున కుప్పతొట్టి పాల్జేసినచో

తల్లిని దైవమనందురె

యెల్లా గురువాయురప్ప యేమందు నయా.34

మావా డమేరికాలో

మీవాడెక్కడ యనుచును మిడిసిపడకురా

రావా యన్నను రాడే

నీవే గురువాయురప్ప నిక్కము గనుమా.35

కాశీ పురమున శివుడవు 

వాశిగ గురువాయురుపుర వాసివి నీవే

చూసెడి చూపుల మాయే

శ్రీ శా గురువాయురప్ప చిన్మయ రూపా.36

విలువలు నేర్పని చదువులు

మలినము చేసెను తలపుల మాయకు లోనై

కలుములు పెంచెను కలిలో

బలిమికి గురువాయురప్ప పాదము పడుదున్.37

కప్పలను వాన పాముల

నప్పనముగ తిని పురుగుల నయ్యో రామా

తిప్పలు పెట్టెను చైనా

ముప్పును గురువాయురప్ప పుడమిని గనుమా.38

యోగము ధ్యానము నేర్వక

రోగములకు భయపడి  భవరోగము పాలై

దోగాడితి భువిపై నిక

భోగము గురువాయురప్ప ముగియింప వయా.39

జోలల పాడుదు మెల్లగ

లాలను పోసెదను బువ్వ రంజుగ పెడుదున్

మాలిమి చేసెద, త్రాగర

పాలను గురువాయురప్ప పాదము పడుదున్.40

గమ్మున క్షాళన చేయుచు

కమ్మగ జోకొట్టి పాడి కథలను చెబుచున్

రమ్మని యెత్తుకు త్రిప్పెడి

బామ్మలు గురువాయురప్ప బలిమే కాదా.41

పాములను ధరించె శివుడు

పాములపైనె పవళించు పన్నగశాయీ

దోమల పాల్జేసిరి మము

యేమని గురువాయురప్ప యిటువొచ్చి తివో.42

కాలము కర్మము తప్పిన

చేలము పామై కరచును చెప్పగనేలా

మేలగు మాటలు నుడివిన

చాలని గురువాయురప్ప చప్పున యనరే.43

నవ్వితి నలుగురినీ గని

నవ్వితి నేడ్చెడి  మనుజుల నావారైనన్

నవ్వితి నేడ్చుట రాకనె

నవ్వితి గురువాయురప్ప నవ్వుల పాలై.44

ఎన్నో జన్మల కర్మలు

నెన్నో తీరని ఋణములు నెన్నడు తీర్చన్

ఎన్నో రోజులు లేవిక

కన్నా  గురువాయురప్ప కరుణించవయా.45

సిగరెటు కాల్చెడి వారలు

తగులాడెడి వారికన్న తక్కువ కాదే

పొగతో ప్రాణము పోవును

తగవూ గురువాయురప్ప తలలే తీయున్.46

కష్టము లెన్నో పడితిని

దుష్టుల సహవాస మహిమ దూరితినెన్నో

ఇష్టముగ చేసియుంటిని

దుష్టుని గురువాయురప్ప దూషించ కయా.47

పందుల వలె పిల్లలకని

పందులవలె పెంచువారు బరువు జగతికిన్

పందికి మనిషికి తేడా

యేందని గురువాయురప్ప యెవరిని యడుగన్.48

తల్లియె దైవమొకప్పుడు

పిల్లకు పిజ్జాలు చిప్సు పెట్టుట సబబా

పిల్లకు కూల్డ్రింకు లిడెడి

తల్లికి గురువాయురప్ప దండము పెడుదున్.49

పరశువు దాల్చినదెందుకు

దొరలనువారి తలలెల్ల దొరలించుటకా

వరలిన శ్రీ రామునినే

నరయగ గురువాయురప్ప హరియే కాదా.50

పంచెలు గట్టుట మరచితి

పంచులు వేయగ తలచితి పద్యము లోనన్

మంచిగ చెప్పిన వినరట

కంచికి గురువాయురప్ప కథలే చేరున్.51

చక్కగ నిద్దుర లెమ్మని

కొక్కొరకోయన్నకోడి కూరై పోయెన్

చొక్కపు పల్కులు నచ్చవు

నిక్కము గురువాయురప్ప నిప్పై కాల్చున్.52

బంగరు జింకలు కలవా

చెంగున రాముడు దుమికెను చెప్పగ నేలా

ముంగిట కష్టము నిలచిన

దంగుడు గురువాయురప్ప తప్పదు కాదా.53

ఏరా రారా పోరా

తేరా మేరా సరేర తీయ్ రా యంటిన్

ఔరా మరచితినే నో

రారా గురువాయురప్ప రామా యనుటన్.54

సారీ చెప్పుట నేర్చితి

సారీ యని సత్యకాళ్ళు శౌరియె బట్టన్

సారీ కొనుటయు మంచిదె

సారీ గురువాయురప్ప సత్యము చెబితిన్.55

తప్పక చెబితిని సారీ

తప్పేమియు చేయకున్న తప్పించుకొనన్

తప్పేమిటి సారీ యన

తప్పెను గురువాయురప్ప తన్నులు నాకున్.56

కిళ్ళీ బుగ్గన నములుచు

నూళ్ళో దారంట వారు నుమ్మేసిరిగా

పళ్ళే పచ్చగ మారును

కిళ్ళీ గురువాయురప్ప కీడే కాదా.57

గుట్కా కిళ్ళీ సిగరెటు

మట్కా యలవాటు మాన మాకష్టముగా

గుట్కా మానుట యెటులో

చిట్కా గురువాయురప్ప చెప్పవె మాకున్.58

మద్యము మించిన హాయిని

పద్యము లిచ్చును సొగసుగ పదములు గూర్పన్

హృద్యంబుగ నే వ్రాసెద

పద్యము గురువాయురప్ప పదుగురు మెచ్చన్.59

జనవరి నెలలో కోళ్ళకు

మనుగడ సంక్రాంతి వరకు మాయే కాదా

పనిగా పందెములాడెడి

మనీషి గురువాయురప్ప మాయముకాడే.60

జాతక మార్తాండ ననుచు

జాతి రతనములను నమ్ము జ్ఞానుల వలనన్

జాతకములు బాగుపడునె

చేతికి గురువాయురప్ప చిప్పే మిగులున్.61

టీవీ లో వార్తల గని

టీవీలో చర్చలువిన డెంగ్యూ కలుగున్

జీవుల ప్రాణము తీసెడి

టీవికి గురువాయురప్ప టీకా లేదే.62

ఆకులు నలములు నమిలిన

మేకలను సుగరును బీపి మ్రింగవు నిజమే

ఆకొన చికెనూ మటనూ

బాకిన  గురువాయురప్ప ప్రాణముపోదా.63

భార్యయె గురువును దైవము

భార్యయె సరిజోడులైన భర్తల కెపుడున్

భార్యయె ప్రాణము నిలుపును

భార్యయె గురువాయురప్ప బంధుగు డౌగా.64

భార్యయె గూగుల్కి గురువు

భార్యయె కంప్యూటరౌను భర్తల కెపుడున్

భార్యయె రక్షణ భర్తకు

భార్యయె గురువాయురప్ప వాయించ నిచో.65

భార్యల మాటలు వినవలె

భార్యల నేడ్పించకున్న భర్తకు మేలౌ

భార్యల కోర్కెలు దీర్చిన

భార్యలు గురువాయురప్ప భర్తల హితులౌ.66

బీరుల్ బ్రాందీ విస్కీల్

పారును వరదై జనవరి పస్టున కనుకన్

ఔరా కరోన భయమను

వారికి గురువాయురప్ప వాక్సిను దొరకున్.67

ఎప్పటి వలెనే వచ్చును

చప్పగ నెలకొక్క ఫస్టు సత్యము సుమ్మీ

గొప్పగ వచ్చెడి దొకటే

చప్పుడు గురువాయురప్ప జనవరి నెలలో.68

పచ్చడి తినెదరుగాదికి

పచ్చడి యగుదురు జనవరి ఫస్టుకి భర్తల్

పచ్చడి యెపుడూ చేదే

పచ్చడి గురువాయురప్ప భార్యలు పెట్టన్.69

నడిరేతిరి స్వాతంత్ర్యము

నడిరేతిరి ఫస్టు వొచ్చి నడతే మార్చెన్

భడవలు త్రాగిన గొడవలు

పడరా గురువాయురప్ప ఫస్టున కూడా.70

పాతకముల గతి మరచిన

జాతకములు మారబోవు శాస్తియె మిగులున్.

చేతలు మారక మన తల

రాతలు గురువాయురప్ప లావగు టెటులో.71

నూతన వత్సరమున మా

యాతన తొలగించవయ్య హారతు లిడుదున్

చేతన కలిగించుచు మా

భీతిని గురువాయురప్ప పెకిలించ వయా.72

బ్రేకింగ్ న్యూసులు గుండెల్

బ్రేకింగ్ జేయును మనుజుల పిచ్చెక్కించున్

మేకింగ్ న్యూసుల కన్నా

బ్రేకింగ్ గురువాయురప్ప రేటింగ్స్ పెంచున్.73

మరచితి గోదానములను

మరచితి గోపూజ నైన మందమతినినేన్

మరచితి గోచారములను

మరచితి గురువాయురప్ప మన్నించ వయా.74

మరచితి నీగుడికేగుట

మరచితి నీపూజసేయ మరచిన పనిగా

మరచితి తిలకము భస్మము

మరిమరి గురువాయురప్ప మన్నించ వయా.75

పండుగ లెన్నో చేసితి

రండని మిము పిలువనైతి లజ్జయె లేకన్

మెండుగ వరములు కోరితి

భండుడ గురువాయురప్ప పాలింప వయా.76

అణువణువున కలవనుచును

మనసారగ తలఁచ నైతి మన్నించుము నా

తనువున కలవంటిరి నిను

గనుటకు గురువాయురప్ప కనులీయ వయా.77

పులి నోటను తల దూర్చుట

చెలిమాటకు మారుమాట చెప్పగతగునే

చెలికన్నను పులిమేలట

కలిలో గురువాయురప్ప కరుణించవయా.78

మమకార మహంకారపు

తమకములో మునిగితేను తప్పేనయ్యా

శమమూ దమమూ నెరుగని

కుమతిని గురువాయురప్ప కోపించ కయా.79

ఇదిగో పొడి చేస్తారని

పదవిచ్చిన పాపమునకు బాగా దోచెన్.

అదియిది అనికనె పన్నులు

వెధవలు గురువాయురప్ప పెంచేస్తిరయా.80

ఎక్కువ కోరను స్వామీ

తక్కువ కాబోదు నీకు తప్పక నిడగన్

మక్కువ కల్గియు నిమ్మా 

గ్రక్కున గురువాయురప్ప కాళ్ళను పడుదున్.81

అల వైకుంఠ పురమ్మున

కులుకుచు సరసమ్ముతోడ కూరిమి సతితో

కలనైనను కన రావయ

కలనని గురువాయురప్ప కరుణించ వయా.82

కరుణా సంద్రుడ వనెదురు

కరుణా భరుణడవనెదరు కాదని యననే

వరముల నేమియు గోరను

వరదా గురువాయురప్ప పాదములిమ్మా.83

దానము ధర్మము నెరుగను

కానిపనుల చేసియుంటి కాదని యనకన్

మానిత సురముని వంద్యా

దీనుడ గురువాయురప్ప దీర్పవె యార్తిన్.84

వారధి గట్టగ నేలా

సారధి గానుండనేల చక్కని తండ్రీ

నేరుగ రావచ్చు ననుచు

తేరగ గురువాయురప్ప తెరచితి తలపుల్.85

అగమము నెత్తగ నేలా

ఖగవాహన మెక్కనేల కరివరదుడవే

తగవులు పెట్టని వాడను

తగనా గురువాయురప్ప తప్పక ప్రోవన్.86

పాలకడలిలో పడకా

పాలూ వెన్నేల నీకు పావన చరితా

వేలకు వేలు సుదతులా

చాలా గురువాయురప్ప చక్కనితండ్రీ.87

అన్నియు నాకే తెలుసని

బన్నము పాలైతినేను పన్నగశయనా

మన్నున గలవక మునుపే

క్రన్నన గురువాయురప్ప కావగరావా.88

చదువులు వ్యాపారంబిట

మదుపరులే తల్లితండ్రి మాయాజగతిన్

ఎదిగిన బిడ్డలు ఎగురుట

విదితమె గురువాయురప్ప వేదన మిగులన్.89

కలుషిత మైనది మా మది

కలుషిత మైనట్టి తనువు కల్మష హరణా

కలుములు బాపగ రావా

కలిలో గురువాయురప్ప కరుణాసింధో.90

క్షేమము పేదలకిట సం

క్షేమ పథకములకు వారి జేబులు నిండున్

క్షేమము ధనవంతులకున్

నా మము గురువాయురప్ప నడుమ జనులకే.91

అన్నీ  పేదలకుచితము

పన్నులు ఫీజులను కట్టు వగపే లేదే

మన్నే మధ్యతరగతికి

వెన్నా గురువాయురప్ప పెద్దలకేగా.92

తనవారి సంతసమునకు

తనవారికి సంపదలని ధనమార్జించన్

చనరారు వెంట తుదకన

వినరే గురువాయురప్ప పిచ్చిమను జులున్.93

చలిలో ముక్కులు గారుట

చలిలో తుమ్ములును దగ్గు జలుబే కాదా

కలిలో నోమైక్రానట

చలిలో గురువాయురప్ప చచ్చిరి జనులే.94

గలగల మాటలనాపక

కలలోనూ  కలవరించు కాంతలకయ్యో

వలలా మాస్కుల గట్టిరి

కలిలో గురువాయురప్ప కాలపు మహిమే.95

మాస్కులు మూతికి ముక్కుకి

వేస్కొన మేలంద్రు గాని వేస్కొనరరెరే

దూస్కొని వచ్చెడి మిత్తికి

మాస్కులు గురువాయురప్ప మహిలో గలవా.96

సిరిగల వాడవనందురు 

త్వరగా వచ్చెదవనంద్రు వాహనమేలా

దొరవై కనపడరావయ

సిరితో గురువాయురప్ప చిన్మయరూపా.97

అడగను సిరులిమ్మని నే

నడిగెద గురు భక్తి నిడగ నడిగెద సరియౌ

నడవడి గడియ గడియకును

పడగను గురువాయురప్ప పాదము లిడగన్.98

మనసుకు తోచిన దంతయు

కనులకు కనబడన వనుచు కవివలె నేనున్

పనిలేక పద్య మల్లెడి

మనిషిని గురువాయురప్ప మన్నించ వయా.99

తరగని సుఖసంపదలును

చెరగని చిరునవ్వుమోము చిందించుచు మా

దొరవై నా చదువరులకు

గురుతును గురువాయురప్ప గురువుగ నిడుమా.100

విత్తును నాటినదీవే

దత్తునివై నాకు పద్య ధారల నిడ నా

చిత్తము నీకే ధారా

దత్తము గురువాయురప్ప తప్పక గొనుమా.101

పద్యము చదివిన వారికి

పద్యము బాగున్నదన్న పాఠకులకు నా

పద్యము మెచ్చని వారిక

వద్యుడ గురువాయురప్ప వందన మందున్.102

కైలాసమునెక్కె శివుడు

పాలకడలిలోన దాగె పన్నగశాయియున్

చాలని ననునీ చెంతకు 

త్రోలిరి గురువాయురప్ప దూరకు మయ్యా.103

సంకము చక్రముదాల్చిన

పంకజనాభా శరణము పద్యము గొని నీ

కింకరుడను నణగించుము

బింకము గురువాయురప్ప ప్రేమము మీరన్.104

గుడులు బడులు తెరచుచు రా

బడులను పెంచుచు జనులకు వైరసు రాకుం

డెడి మంచి రోజులి డుమా

వడిగా గురువాయురప్ప భరతావనికిన్.105

స్వేచ్చగ నూపిరి బీల్చుచు

పచ్చని వరిచేలు పాడి పంటలు పెంపై

మ్రుచ్చులు నాశనమయ్యెడి

ముచ్చట గురువాయురప్ప పుడమికి నిమ్మా.106

గారెలు బొబ్బట్లరిసెలు

బూరెలు నెయ్వేసి  పప్పు భోజనమును నే

కోరి తినిపించెదనురా

వేరుగ గురువాయురప్ప వెన్న పెడుదునే.107

వెన్నయు పాల్పాయసమును

మన్నును మీగడలు జున్ను మరిమరి పెడుదున్

తిన్నగ రారా యింటికి 

కన్నా గురువాయురప్ప కలియుగ వరదా.108